گاڤ - تایبەت
کێشەیا نوینەکرنا گرێبەستێن ب سەدان کارمەندێن ساخلەمییا دهۆکێ بۆ دەما چەندین سالانە بەردەوامە و ئەڤسالە ژی ئەڤە هەیڤا چارێ تەمام بوو و هێشتا وان ئێک مووچە ژى وەرنەگرتییە.
گاڤ ب رێکا نوینەرێن کارمەندێن گرێبەست یێن پارێزگەها دهۆکێ زانییە: 322 کارمەندێن گرێبەست ل سەر بودجەیا پەرەپێدانێ یا رێڤەبەرییا گشتی یا ساخلەمییا پارێزگەها دهۆکێ هەنە، 45 ژ وان ل سنۆرێ ئیدارەیا سەربەخۆ یا زاخۆ نە، یێن دی ل سنۆرێن قەزایێن جودا یێن دهۆکێ نە.
گاڤ پار و پێرار ژی چەندین جاران دویڤچوون بۆ گازندەیێن وان کارمەندان کرییە، پێرار تا هەیڤا نەهـ وان مووچە وەرنەگرتبوو و پار ژی، تا هەیڤا شەش وان چ مووچە وەرنەگرتبوون و گرێبەستێن وان نەهاتبوونە نویکرن، ئەڤسالە ژی هەیڤا پێنج دەستپێکرییە و هەمان کێشە بەردەوامە.
ئێک ژ نوینەرێن کارمەندێن گرێبەست یێن ساخلەمییێ ل سنۆرێ زاخۆ بۆ گاڤ گۆت: بەری جەژنێ وان مووچەیەک وەرگرتییە و گرێبەستێن کارمەندێن سنۆرێ زاخۆ کو 45 کەسن، دهێنە نویکرن.
ئەو کارمەندێن دمینن کو 277 کەسن و سەر ب ساخلەمییا دهۆکێ ڤەنە و ب گۆتنا نوینەرێن وان، ساخلەمییا دهۆکێ نڤیسارا وان هنارتییە وەزارەتا ساخلەمییێ، وەزارەتا ساخلەمییێ ژی بۆ وەرگرتنا رازیبوونێ هنارتییە وەزارەتا دارایی و جڤاتا وەزیران، لێ رازیبوون ل سەر نەهاتییە و گرێبەستێن وان نەهاتینە نویکرن.