گاڤ

دو لژنه‌ بۆ به‌حسكرنا دوباره‌ ده‌ستپێكرنا هنارده‌كرنا په‌ترۆلا كوردستانێ هاتینه‌ پێكئینان و دێ د حه‌فتییا بهێت دا ل گه‌ل وه‌زاره‌تا په‌ترۆلێ یا ئیراقێ كۆمبن و دێ نوینه‌رێن هه‌رێما كوردستانێ ژى د وان لژنه‌یان دا هه‌بن.

هه‌ر ژ رۆژا 25ى ئادارا سالا 2023 پشتى بڕیارا ده‌سته‌یا ناڤبژیڤانییێ یا گرێداى ژوورا بازرگانى یا نێڤده‌وله‌تى ل پاریس ب پێگیركرنا توركیا ب دانا 1.5 ملیار دۆلاران وه‌ك قه‌ره‌بۆ بۆ ئیراقێ ژ به‌ر هنارتنا په‌ترۆلا كوردستانێ ب رێكا توركیا دناڤبه‌را سالێن 2014 و 2018 دا، هنارتنا په‌ترۆلا كوردستانێ راوه‌ستیایه‌.

سه‌ره‌راى رێككه‌فتنا حكومه‌تێن هه‌رێما كوردستانێ و ئیراقێ ل ده‌ستپێكا هه‌یڤا نیسانێ یا سالا 2023 ل سه‌ر فرۆشتنا په‌ترۆلا كوردستانێ ب رێكا كۆمپانیا سومۆ یا فیدرالى و جێگیركرنا ڤێ چه‌ندێ د یاسایا بودجه‌یا گشتى یا ئیراقێ دا، هێشتا هنارتن ده‌ستپێنه‌كریه‌.

حه‌یان عه‌بدولغه‌نى جێگرێ سه‌رۆكوه‌زیرێ ئیراقێ و وه‌زیرێ په‌ترۆلێ دیاركر "دو لژنه بۆ بابه‌تێ هنارده‌كرنا په‌ترۆلێ‌ هاتینه‌ دروستكرن، ئێك یا ته‌كنیكى یه‌ و یا دى یا یاسایى یه‌".

ئاشكرا ژى كر "د ده‌ستپێكا حه‌فتییا بهێت دا وه‌زاره‌تا په‌ترۆلێ دێ ل گه‌ل وان هه‌ردو لژنه‌یان كۆمبیت كو نوینه‌رێن حكومه‌تا هه‌رێما كوردستانێ و وه‌زاره‌تا سامانێن سرۆشتى ژى تێدا هه‌نه‌".

ئاماژه‌ ب وێ چه‌ندێ ژى كر كو نیازێن چاره‌كرنا بابه‌تى و ده‌ستپێكرنا هنارده‌كرنا په‌ترۆلا هه‌رێمێ هه‌نه‌.