داخوازا زیندانكرنا له‌یلا زانایێ دهێته كرن
بەلاڤ بکە
گاڤ
ئه‌ڤرۆ چاره‌مین روینشتنا دادگه‌هكرنا سیاسه‌تمه‌دار و په‌ڕله‌مانتارا پێشتر یا كورد له‌یلا زانایێ ژ لایێ دادگه‌ها سزایێن گران ل ئه‌نقه‌ره‌یا پایته‌ختێ تركیا برێڤه چوو، داخوازكارێ گشتى ژى خواست، زانا ب تۆمه‌تا ئه‌ندامبوونا پارتا كاركه‌رێن كوردستانێ "په‌كه‌كێ" بهێته سزادان.
له‌یلا زانا كو خه‌لكا باژێرێ فارقینێ (سیلوان) یا گرێداى ئامه‌دێ یه، ل سالا 1991ێ وه‌كو ئێكه‌م په‌ڕله‌مانتارا كورد بوو ئه‌نداما په‌ڕله‌مانێ تركیا، لێ ژبه‌ر كو سویندا په‌ڕله‌مانتاریێ ب زمانێ كوردى خواند، هه‌ر زوى په‌ڕله‌منتاریا وێ هاته هه‌لوه‌شاندن و ل سالا 1994ێ بڕیارا زیندانكرنا وێ هاته دان و تا سالا 2004ێ ما د زیندانێڤه.
ئه‌ڤرۆ ژى چاره‌مین روینشتنا دادگه‌هكرنا له‌یلا زانایێ لسه‌ر پێشكێشكرنا دو گۆتار و چه‌ند بۆچوونان كو ل سالێن 2014ێ و 2015ێ ئینابوونه زمان برێڤه چوو، دۆسیه‌یا وێ ژلایێ دادگه‌ها 27ێ یا سزایێن گران یا ئه‌نقه‌ره هاتییه ڤه‌كرن و تێدا له‌یلا زانا ب ئه‌ندامبوونا په‌كه‌كێ هاتییه تۆمه‌تباركرن .
د روینشتنا ئه‌ڤرۆ پێنجشه‌مبێ دا، له‌یلا زانا ب رێكا ڤیدیۆ كۆنفرانسى پشكدار بوو، داخوازكارێ گشتى خواست له‌یلا زانا بهێته سزادان. هه‌ر د دۆسیه‌یێ دا، وه‌رگرتنا خه‌لاتێن نێڤده‌وله‌تى ژلایێ زانایێ ڤه ب تاوان هاتییه هژمارتن.
رونشتنا ئه‌ڤرۆ لسه‌ر داخوازا ئیبراهیم چەلیکەر، پارێزەرێ لەیلا زانایێ كو داخوازا پێدانا پتر ده‌مێ كر، بۆ 2ى تیرمه‌ها ئه‌ڤساله هاته پاشخستن.
