ههر یاریكهرهكێ ههلبژارتییێ ئولۆمپى یێ ئیراقێ دێ پارچهیهكا عهردى و 10 ملیۆن دیناران وهرگریت
گاڤ
ب بڕیارا سهرۆكوهزیرێ ئیراقێ، ههر یاریكهرهك و ههر ئهندامهكێ شاندێ ههلبژارتییێ ئۆلۆمپى یێ ئیراقێ دێ پارچهیهكا عهردى و 10 ملیۆن دیناران زێدهبارى پاداشتهكێ ههیڤانه وهرگریت.
ههلبژارتییێ ئولۆمپى یێ ئیراقێ شیابوو د جاما ئاسیا یا ههلبژارتییێ ئولۆمپى دا ل قهتهرێ رێزا سیێ بدهستڤهبینیت و پلێتا دهربازبوونێ بۆ ئولۆمپیادێن پاریس 2024 بدهستڤهئینا.
محهمهد شیاع سوودانى سهرۆكوهزیرێ ئیراقێ ئهڤرۆ ئێكشهمبییێ پێشوازى ل شاندێ ههلبژارتییێ ئولۆمپى یێ ئیراقێ كر.
د بهیانهكا ئۆفیسا سهرۆكوهزیرێ ئیراقێ دا هاتیه "سهرۆكوهزیرێ ئیراقێ بڕیار دا ل گۆرهى یاسایا پاداشتێن وهرزشڤانان و پیشهنگان ژماره 6 یا سالا 2013، پارچهیێن عهردى و پاداشتێن ههیڤانه یێن بهردهوام زێدهبارى دههـ ملیۆن دیناران بدهته ههر ئهندامهكێ شاندێ ههلبژارتییێ ئولۆمپى یێ ئیراقێ".
ههروهسا سهرۆكوهزیرێ ئیراقێ بڕیارا پاداشتكرنا عهلى عهمار یهسر قارهمانێ بلندكرنا قۆرساییان ژى دا پشتى دهربازبوویه ئولۆمپیادێن پاریس.
ئۆلۆمپیادێن پاریس دێ ل ههیڤا تیرمههێ دهستپێكهن، ههلبژارتییێ ئولۆمپى یێ ئیراقێ د قارهمانییا تهپاپێى یا ئولۆمپیادان دا د كۆما ئهرجهنتین، مهغریب و ئۆكراینا دا دێ یارییێ كهت و یارییا وێ یا ئێكێ ل گهل ئۆكراینایه ل رۆژا 24ى تیرمههێ.