ئیراقێ رۆژانه 307 هزار بهرمیلێن پهترۆلێ بۆ ئهمریكا هناردهكرینه
گاڤ
هناردهكرنا پهترۆلا ئیراقێ بۆ ئهمریكا د حهفتییا بۆرى دا كێمبوویه و ئیراق ل رێزا پێنجێ د رێزبهندییا وهلاتێن هناردهكارێن پهترۆلێ دا بۆ ئهمریكا هات.
كارگێرییا زانیاریێن وزهیێ یا ئهمریكى ئهڤرۆ ئێكشهمبییێ راگههاند "د حهفتییا بۆرى دا، ئیراقێ رۆژانه وهك تێكرا 307 هزار بهرمیلێن پهترۆلێ هناردهى ئهمریكا كرینه و ب ڤێ چهندێ ئیراق پێنجهم مهزنترین هناردهكارا پهترۆلێ یه بۆ ئهمریكا وێ حهفتییێ دا".
ديار ژى كریه "هناردهكرنا پهترۆلا ئیراقێ بۆ ئهمریكا د حهفتییا بۆرى دا ب بڕێ هزار بهرمیلان رۆژانه كێمبوویه ب ههڤبهركرن ل گهل حهفتییا بهرى وێ كو تێدا تێكرایێ رۆژانه یێ هناردهكرنێ 308 هزار بهرمیل بوون".
ههر ل گۆرهى خشتهیێن كارگێریێ "كهنهدا ل حهفتییا بۆرى ل رێزا ئێكێ بۆ هناردهكرنا پهترۆلێ بۆ ئهمریكا ب تێكرایێ رۆژانه یێ 3 ملیۆن و 847 هزار بهرمیلان هات، ل دویڤ دا مهكسیك ب تێكرایێ رۆژانه یێ 459 هزار بهرمیلان ل رێزا دوێ، سعوودیه ب تێكرایێ رۆژانه یێ 402 هزار بهرمیلان ل رێزا سیێ و كولۆمبیا ب تێكرایێ رۆژانه یێ 363 هزار بهرمیلان ل رێزا چارێ هاتن".
ئاماژه ب وێ چهندێ ژى كریه "ئهمریكا د حهفتییا بۆرى دا رۆژانه وهك تێكرا 5 ملیۆن و 565 هزار بهرمیلێن پهترۆلێ ژ 7 وهلاتێن سهرهكى هاوردهكرینه ب زێدهبوونا ب بڕێ 17 هزار بهرمیلان رۆژانه ب ههڤبهركرن ل گهل حهفتییا بهرى وێ كو تێدا تێكرایێ رۆژانه یێ هاوردهكرنێ 5 ملیۆن و 548 هزار بهرمیل بوون".