گاڤ – تایبەت 
نوینەرێ کارمەندێن گرێبەست ل سەر بودجەیا پەرەپێدانێ ل وەزارەتا ساخلەمییێ، پشتی چار مەهان ژ گیربوونێ، ژڤانێ دانا مووچەیێن وان ئاشکرا دکەت، لێ ئەو درژدن خرڤەبوونەکا نەرازیبوونێ بکەن.
سەنگاو محەمەد، نوینەرێ کارمەندێن گرێبەستێن پەرەپێدانێ ل وەزارەتا ساخلەمییا هەرێما کوردستانێ بۆ گاڤ گۆت: ل سنۆرێ پارێزگەها دهۆکێ 322 کارمەندێن گرێبەست ل سەر بودجەیا پەرەپێدانێ یا رێڤەبەرییا گشتی یا ساخلەمییێ هەنە، 45 ژ وان ل زاخۆنە و مووچەیەک بەری جەژنا رەمەزانێ وەرگرتییە، لێ 277 کارمەندێن سەر ب ساخلەمییا گشتی یا دهۆکێ ڤە، ئەڤسالە چ مووچە وەرنەگرتینە.
سەنگاو محەمەدی دەربارەی مووچەیێ چار مەهان یێ ڤان کارمەندان مزگینییەک ب رێکا گاڤ راگەهاند و گۆت: وەزارەتێ رازیبوون ل سەر خەرجکرنا مووچەیێن وان دایە و د ڤێ حەفتییێ تا حەفتییا بهێت دا ، دێ هەرچار مووچەیان پێکڤە وەرگرن.
هەرچەندە وەزارەت رازیبوویە مووچەیێن وان کارمەندان بدەت، لێ ل گۆرەی زانیارییێن گاڤ، سوبەهی ل دەمژمێر 10:00ی سپێدێ ژمارەکا ڤان کارمەندان ژ هەرسێ پاریزگەهێن دهۆک، هەولێر، و سلێمانییێ، ل گەل نوینەرێن وان دێ خرڤەبوونەکا نەرازیبوونێ ل بەر دەرگەهێ جڤاتا وەزیرێن هەرێما کوردستانێ کەن و د وێ خرڤەبوونێ دا دێ داخوازا دامەزراندنێ کەن.