گاڤ

سه‌رۆكێ چینێ بۆ جارا ئێكێ پشتى بۆرینا پێنج سالان د گه‌شته‌كێ دا گه‌هشته‌ ئه‌ورۆپا و د سه‌ره‌دانه‌كا دو رۆژى دا دێ دانوستاندنان ل گه‌ل سه‌رۆكێ فره‌نسا و سه‌رۆكا كۆمیسیۆنا ئه‌ورۆپى ئه‌نجامده‌ت.

شى جین پینگ سه‌رۆكێ چینێ ل ئێڤارییا ئه‌ڤرۆ ئێكشه‌مبییێ ل فڕۆكه‌خانه‌یا پاریس ئورلى ژ لایێ گابرییێل ئه‌تال سه‌رۆكوه‌زیرێ فره‌نسا ڤه‌ پێشوازى لێ هاته‌ كرن.

كۆمبوون و دانوستاندنێن سه‌رۆكێ چینێ سوبه‌هى دوشه‌مبییێ دێ ده‌ستپێكه‌ن و تێدا دێ ل گه‌ل ئیمانوێل ماكرۆن سه‌رۆكێ فره‌نسا ژماره‌یه‌كا بابه‌تان ژ وان ژى شه‌ڕێ ل ئۆكراینا به‌حسكه‌ت.

هه‌روه‌سا ئورسۆلا ڤون دێر لاین سه‌رۆكا كۆمیسیۆنا ئه‌ورۆپى دێ پشكدارییێ د دانوستاندنێن سه‌رۆكێن فره‌نسا و چینێ دا ل كۆچكا ئێلیزى كه‌ت و تێدا دێ بابه‌تێن بازرگانى هێنه‌ به‌حسكرن.

ئه‌ڤه‌ ب سه‌ره‌دانا سیێ یا سه‌رۆكێ چینێ بۆ فره‌نسا هه‌ر ژ ده‌مێ وه‌رگرتنا وى بۆ ده‌ستهه‌لاتێ ل ئادارا سالا 2013 تا نوكه‌ دهێته‌ هژمارتن.

ئه‌ڤ سه‌ره‌دانا ب هه‌لكه‌فتنا بۆرینا 60 سالان ل سه‌ر په‌یوه‌ندیێن دپلۆماسى دناڤبه‌را فره‌نسا و چینێ دایه‌ و ده‌ستپێكا ئێكه‌م گه‌شتا سه‌رۆكێ چینێ یه‌ بۆ ئه‌ورۆپا هه‌ر ژ ده‌مێ به‌لاڤبوونا په‌ژیكا كۆرۆنایێ تا نوكه‌، وه‌كى سه‌رۆكاتییا فره‌نسا ئاماژه‌پێكرى.

هه‌روه‌سا ئیمانوێل ماكرۆن سه‌رۆكێ فره‌نسا ل نیسانا سالا بۆرى 2023 سه‌ره‌دانا بێجین و كانتون ل چینێ كربوو.