رۆژنامه‌یا هامشه‌هر یا ئیرانى: ناڤه‌ڕۆكا سه‌ره‌دانا نێچیرڤان بارزانى بۆ ته‌هرانێ پێنج ته‌وه‌رێن
بەلاڤ بکە
گاڤ
رۆژنامه‌یا هامشه‌هر یا ئیرانى ناڤه‌ڕۆكا كۆمبوونێن سه‌رۆكێ هه‌رێما كوردستانێ ل ته‌هرانێ ئاشكرادكه‌ت و دبێژیت: پێنج ته‌وه‌ر مژارێن سه‌ره‌كى نه، هه‌لبژارتن و ره‌وشا ناڤخۆ یا هه‌رێمێ ژ خالێن گرنگ یێن ناڤه‌ڕۆكا كۆمبوونانه.
دوهى ئێكشه‌مبێ سه‌رۆكێ هه‌رێما كوردستانێ ل گه‌ل هه‌ر دو جێگیرێن سه‌رۆكێ هه‌رێمێ گه‌هشته ته‌هرانا پایته‌ختێ ئیرانێ، ئه‌ڤرۆ كۆمبوونێن گرنگ هه‌نه.
رۆژنامه‌یا هامشه‌هر یا ئیرانێ ناڤه‌ڕۆكا كۆمبوونێن نێچیرڤان بارزانى، سه‌رۆكێ هه‌رێما كوردستانێ ل گه‌ل مه‌زنه به‌رپرسێن ئیرانێ به‌لاڤكریه و دیاركریه، بهێزكرن و باشتركرنا په‌یوه‌ندییان بۆ بجهئینانا ئارمانجێن باشتر بۆ هه‌ر دو وه‌لاتان ناڤه‌ڕۆكا هه‌ر پێنج خالانه.
ته‌وه‌رێن كۆمبوونێن سه‌رۆك نێچیرڤان ل ته‌هرانێ
- بجهئینانا رێككه‌فتنا ئێمناهیێ د ناڤبه‌را ئیران و ئیراقێ دا
- ره‌تكرنا هه‌بوونا مووسادێ ل هه‌رێمێ
- هه‌ڤكاریێن ئابۆرى و بازرگانى
- هاریكارییا ئیرانێ بۆ چاره‌كرنا قه‌یرانێن ناڤخۆ یێن هه‌رێمێ
- هه‌لبژارتنێن هه‌رێما كوردستانێ
ئه‌ڤرۆ دوشه‌مبێ 6-5-2024ێ نێچیرڤان بارزانى، سه‌رۆكێ هه‌رێما كوردستانێ ل گه‌ل ئیبراهیم ره‌ئیسى، سه‌رۆككۆمارێ ئیرانێ كۆمبوو، گرنگترین مژارێن كۆمبوونێ پرسێن ئێمناهیێ و ره‌وشا رۆژهه‌لاتا ناڤین و په‌یوه‌ندیێن ناڤبه‌را ته‌هران و هه‌ولێرێ نه.
ئه‌ڤرۆ و سوبه‌هى نێچیرڤان بارزانى، سه‌رۆكێ هه‌رێما كوردستانێ ل گه‌ل رابه‌رێ بلندێ كۆمارا ئیسلامى یا ئیرانێ عه‌لى خامنه‌یى، سه‌رۆكێ په‌ڕله‌مانى و چه‌ندین مه‌زنه به‌رپرسێن دى یێن وى وه‌لاتى كۆمدبیت.
نازم ده‌باغ، نوینه‌رێ حكومه‌تا هه‌رێما كوردستانێ ل ئیرانێ بۆ گاڤ گۆت: كۆمارا ئیسلامى یا ئیرانێ و حكومه‌تا هه‌رێمێ په‌یوه‌ندیێن كه‌ڤن هه‌نه و ئاشكراكر، نێچیرڤان بارزانى دێ دوپات كه‌ت هه‌رێما كوردستانێ نابیته فاكته‌رێ گه‌فان ل سه‌ر به‌رژه‌وه‌ندیێن جیرانان.
