سه‌ره‌دانا سه‌رۆك نێچیرڤان بارزانى د میدیایا ئیرانێ دا
بەلاڤ بکە
گاڤ
رۆژنامه، مالپه‌ڕ و ئاژانسێن ئیرانێ یێن گشتى و هنده‌كێن سه‌ر ب جڤاتا ئاساییشا نشتیمانى یا ئیرانێ، سه‌رۆكێ په‌ڕله‌مانێ ئیرانێ و سوپایێ پاسداران و حكومه‌ت و په‌ڕله‌مانێ ئیرانێ ڤه ب گرنگ به‌حس ل سه‌ره‌دانا نێچیرڤان بارزانى، سه‌رۆكێ هه‌رێما كوردستانی دكه‌ن و ب سه‌ره‌دانه‌كا سیاسى و ئابۆرى بۆ به‌ره‌ف پێشبرنا په‌یوه‌ندیێن ناڤبه‌را هه‌ولێر و ته‌هرانێ دیاردكه‌ن.
دوهى ئێڤارى سه‌رۆكێ هه‌رێما كوردستانێ گه‌هشته ته‌هرانێ، دهێته چاڤه‌ڕێكرن دو رۆژان ل ته‌هرانا پایته‌خت ل گه‌ل مه‌زنه به‌رپرسێن وى وه‌لاتى گرنگترین مژاران به‌حس بكه‌ت.
میدیایا ئیرانێ ب گرنگ به‌حس ل سه‌ره‌دانا نێچیرڤان بارزانى بۆ ته‌هرانێ كریه و پتریا رۆژنامه‌یان مالپه‌ڕێ ئێكێ بۆ مژاره‌كا گرنگ یا كۆمبوونێن گرنگ یێن سه‌رۆكێ هه‌رێما كوردستانێ و مه‌زنه به‌رپرسێن ئیرانێ ته‌رخانكریه.
مژاره‌كا سه‌ره‌دانێ مالپه‌ڕێ تابناك كو ژ محه‌مه‌د باقر قالیباف، سه‌رۆكێ په‌ڕله‌مانى نێزیكه به‌حس ل گرنگییا سه‌ره‌دانا سه‌رۆكێ هه‌رێما كوردستانێ بۆ ته‌هرانێ دكه‌ت و دبێژیت: گرنگییا ڤێ سه‌ره‌دانێ سه‌رۆك نێچیرڤان دێ ل گه‌ل هه‌ژماره‌كا به‌رپرسێن بلند یێن ئیرانێ كۆمبیت، ئه‌ڤ یه‌كه پشتى سێ سالانه بۆ ته‌هرانێ و دێ بیته ئه‌گه‌رێ باشتركرنا په‌یوه‌ندیێن ناڤبه‌را ته‌هران و هه‌ولێرێ ژ روویێ سیاسى و ئابۆرى ڤه.
رۆژنامه‌یا ئارمانى میللى، مانشێتێ سه‌ره‌كى تایبه‌ت كریه بۆ سه‌ره‌دانا نێچیرڤان بارزانى و رافایل گرۆسى، سه‌رۆكێ ئاژانسا نێڤده‌وله‌تى یا تێهنێ دبێژیت: د ڤان رۆژان دا ئیران بوویه مه‌كۆیێ سه‌ره‌دانێن كه‌سایه‌تیێن ناڤدار یێن نێڤده‌وله‌تى بۆ كاروبارێن دبلۆماسى و بهێزكرنا په‌یوه‌ندیێن سیاسى یێن ئه‌ورۆپى و جیران.
رۆژنامه‌یا ئارمانى ئیمرۆز ژى په‌رێ خۆ یێ ئێكێ كریه سه‌رۆك نێچیرڤان و هووركاریێن سه‌ره‌دانێ به‌حسكرینه و دیاركریه، سه‌رۆكێ هه‌رێما كوردستانێ دێ ل گه‌ل هه‌ژماره‌كا به‌رپرسێن بلند یێن ئیرانێ كۆمبیت، ژ وان سه‌رۆككۆمار و رابه‌رێ كۆمارا ئیسلامى یا ئیرانى و په‌یوه‌ندیێن سیاسى و ئابۆرى و روودانێن گرنگێن ناوچێ و جیهانێ نه.
هه‌روه‌سا مالپه‌ڕێ ئاژانسا هه‌والنێریى مه‌شره‌ق كو سه‌ر ب جڤاتا ئاساییشا نشتیمانى یا ئیرانێ یه دیاركریه، پشتى بۆرینا سێ سالان ل سه‌ر سه‌ره‌دانا نیچیرڤان بارزانى، جاره‌كا دى نێچیرڤان بارزانى سه‌را ته‌هرانێ دا و په‌یوه‌ندیێن ئیران و هه‌رێمێ مژارا سه‌ره‌كى یا كۆمبوونێ نه.
مالپه‌ڕێ ته‌سنیم كو نێزیكى پاسدارێن ئیرانێ یه به‌حس ل سه‌ره‌دانا سه‌رۆكێ هه‌ریما كوردستانێ كریه و دیاركریه، روودانێن ناوچێ و بزاڤا باشتركرنا په‌یوه‌ندیێن هه‌ولێر و ته‌هرانێ مژاره‌كا گرنگ یا سه‌رۆكێ هه‌رێمێ و مه‌زنه به‌رپرسێن ئیرانێ نه.
رۆژنامه‌یا كوردپرێس كو نێزیكى حكومه‌تا وى وه‌لاتى یه دیاركریه، په‌یوه‌ندیێن هه‌ولێر و ته‌هرانێ مژارا كۆمبوونێن سه‌رۆكێ هه‌رێما كوردستانێ ل گه‌ل عه‌لى خاممنه‌یى، رێبه‌رێ كۆمارا ئیسلامى یا ئیرانێ، ئیبراهیم ره‌ئیسى، سه‌رۆككۆمار، محه‌مه‌د باقر قالیباف، سه‌رۆكێ په‌ڕله‌مانى، ئه‌میر حوسێن عه‌بدوللـه‌هیان، وه‌زیرێ ده‌رڤه یێ ئیرانێ به‌لاڤكرینه و دیاركریه، پرسێن ناڤبه‌را هه‌ولێر و ته‌هرانێ دێ هێنه به‌حسكرن، پرس گرێدایى ئابۆرى و سیاسى نه.
ژ ئالیێ خۆ ڤه نازم ده‌باغ، نوینه‌رێ حكومه‌تا هه‌رێما كوردستانێ ل ئیرانێ بۆ گاڤ گۆت: كۆمارا ئیسلامى یا ئیرانێ و حكومه‌تا هه‌رێمێ په‌یوه‌ندیێن كه‌ڤن هه‌نه و ئاشكراكر، نێچیرڤان بارزانى دێ دوپات كه‌ت هه‌رێما كوردستانێ نابیته فاكته‌رێ گه‌فان ل سه‌ر به‌رژه‌وه‌ندیێن جیرانان.
ئه‌ڤرۆ و سوبه‌هى نێچیرڤان بارزانى، سه‌رۆكێ هه‌رێما كوردستانێ، ل گه‌ل هه‌ر دو جێگیرێن سه‌رۆكێ هه‌رێم و وه‌زیرێ ناڤخۆ یێ حكومه‌تا هه‌رێمێ دێ ل گه‌ل رابه‌رێ بلندێ كۆمارا ئیسلامى یا ئیرانێ عه‌لى خامنه‌یى، سه‌رۆكێ په‌ڕله‌مانى و وه‌زیرێ ده‌رڤه و چه‌ندین مه‌زنه به‌رپرسێن دى یێن وى وه‌لاتى كۆمبیت.
