سه‌رۆك نێچیرڤان بارزانى: هه‌رێما كوردستانێ هه‌رده‌م دێ فاكته‌رێ سه‌قامگیرییێ بیت
بەلاڤ بکە
گاڤ
سه‌رۆكێ هه‌رێما كوردستانێ راگه‌هاند؛ هه‌رێما كوردستانێ هه‌رده‌م دێ فاكته‌رێ ئارامى و سه‌قامگیرییێ بیت ل ده‌ڤه‌رێ و بۆ چ لایه‌نان نابیته گه‌ف.
د درێژییا سه‌ره‌دانا خۆ دا بۆ ته‌هرانێ، سه‌رۆك نێچیرڤان بارزانى و شاندێ ل گه‌ل دا ئه‌ڤرۆ دوشه‌مبییێ ل گه‌ل عه‌لى ئه‌كبه‌ر ئه‌حمه‌دیان ئه‌میندارى جڤاتا بلند یا ئاسایشا نیشتیمانى یا ئیرانێ كۆمبوو.
سه‌رۆكاتییا هه‌رێما كوردستانێ راگه‌هاند "د كۆمبوونه‌كێ دا، هه‌ردو لایان بیروبۆچوون ل دۆر ره‌وشا ئه‌منى و هاریكارى و هه‌ماهه‌نگییا كۆمارا ئیسلامى یا ئیرانێ و ئیراقێ و هه‌رێما كوردستانێ بۆ پاراستنا ئارامى و سه‌قامگیرییێ هه‌روه‌سا مه‌ترسیێن ئه‌منى یێن ده‌ڤه‌رێ و كارتێكرن و ده‌رهاڤێژێن وان لێكگوهۆڕین".
دیار ژى كریه "هه‌ردو لایه‌نان دوپاتى ل سه‌ر هاریكارییا هه‌ڤپشك و هه‌ماهه‌نگییا لایه‌نێن په‌یوه‌ندیدار یێن هه‌ردو وه‌لاتان بۆ ئارامى و ئاسایشێ كرن و د هه‌ڤڕا بوون ل سه‌ر گرنگییا رێگرتنێ ل به‌رفره‌هبوونا ئالۆزییان و دویربوونا ده‌ڤه‌رێ ژ ئالۆزیێن پتر".
سه‌رۆكاتییا هه‌رێمێ ئاماژه ب وێ چه‌ندێ ژى كریه "د كۆمبوونه‌كێ دا، ئه‌حمه‌دیان به‌رده‌وامییا پشته‌ڤانییا وه‌لاتێ خۆ بۆ ئیراقێ ب هه‌رێما كوردستانێ ڤه ده‌ربڕى".
هه‌روه‌سا سه‌رۆك نێچیرڤان بارزانى دوپاتكر "هه‌رێما كوردستانێ وه‌ك هه‌رده‌م دێ فاكته‌رێ ئارامى و سه‌قامگیرییێ بیت ل ده‌ڤه‌رێ و بۆ چ لایه‌نان نابیته گه‌ف".
