گاڤ

سه‌رۆك بارزانى ب پێدڤى زانى حكومه‌تا ئیراقێ ب گرنگى ڤه‌ دوسیه‌یا قۆربانییێن ده‌ستێ رژێما به‌رێ یا ئیراقێ بكه‌ته‌ ئه‌وله‌ویه‌ت و ب شێوه‌یه‌كێ ژ هه‌ژى و دادپه‌روه‌رانه‌ قه‌ره‌بۆیا هه‌مى كه‌سوكارێن شه‌هید و ئه‌نفالكرییان و زیانڤێكه‌فتییێن ده‌ستێ وێ رژێمێ بكه‌ت.

سه‌رۆك مه‌سعوود بارزانى ئه‌ڤرۆ دوشه‌مبییێ ل سه‌لاحه‌دین پێشوازى ل لژنه‌یا شه‌هیدان و قۆربانییان و زیندانییێن سیاسى د جڤاتا نوینه‌رێن ئیراقێ دا كر.

ل گۆره‌ى به‌یانه‌كا باره‌گایێ بارزانى "د ديداره‌كێ دا، بیروبۆچوون ل دۆر پێشڤه‌برنا هه‌ماهه‌نگییێ دناڤبه‌را هه‌رێما كوردستانێ و حكومه‌تا ئیراقێ دا هاتنه‌ لێكگوهۆڕین ب مه‌به‌ستا پتر خزمه‌تكرنا كه‌سوكارێن شه‌هیدان و ئه‌نفالكرییان و زیانڤێكه‌فتیێن ده‌ستێ رژێما به‌رێ یا ئیراقێ".

د به‌یانێ دا هاتیه‌ ژى "د دیداره‌كێ دا، سه‌رۆك بارزانى به‌حس ل تاوانێن رژێما به‌رێ یا ئیراقێ به‌رانبه‌ر گه‌لێ كوردستانێ كر و ب پێدڤى زانى حكومه‌تا ئیراقێ ب گرنگى ڤه‌ دوسیه‌یا قۆربانییێن ده‌ستێ رژێما به‌رێ یا ئیراقێ بكه‌ته‌ ئه‌وله‌ویه‌ت و ب شێوه‌یه‌كێ ژ هه‌ژى و دادپه‌روه‌رانه‌ قه‌ره‌بۆیا هه‌مى كه‌سوكارێن شه‌هید و ئه‌نفالكرییان و زیانڤێكه‌فتییێن ده‌ستێ وێ رژێمێ بكه‌ت".

باره‌گایێ بارزانى دیار ژى دكه‌ت "هه‌ر د وێ دیدارێ دا، سه‌رۆك و ئه‌ندامێن لژنه‌یا شه‌هیدان و قۆربانییان و زیندانییێن سیاسى د جڤاتا نوینه‌رێن ئیراقێ دا كورتییه‌ك ژ كار و پرۆژه‌ و ئارمانجا سه‌ره‌دانا وان بۆ هه‌رێما كوردستانێ و هه‌ماهه‌نگییا ل گه‌ل حكومه‌تا هه‌رێما كوردستانێ به‌حسكرن".