ستراتیژییه‌كا نوى بۆ هه‌وا بانگه‌شه‌یێ یا جۆ بایدن بۆ هه‌لبژارتنێن سه‌رۆكاتییا ئه‌مریكا هاتیه دانان
بەلاڤ بکە
گاڤ
ئیداره‌یا هه‌وا هه‌لبژارتنان یا سه‌رۆكێ ئه‌مریكا په‌نا بۆ ستراتیژییه‌كا نوى برن ئه‌و ژى كێمكرنا ده‌ركه‌فتنا سه‌رۆكى دناڤبه‌را جه‌ماوه‌رى دا و پێشكێشكرنا گۆتارێن كورت.
كوێنتین فولكس جێگرێ رێڤه‌به‌رێ هه‌وا جۆ بایدن بۆ هه‌لبژارتنێن سه‌رۆكایه‌تییا ئه‌مریكا راگه‌هاند "ستراتیژییا نوى گرنگییێ دده‌ته كوالێتییێ و نه‌ك چه‌ندایه‌تییێ".
د چاڤپێكه‌فتنه‌كا ته‌له‌ڤزیۆنى دا ل دۆر ستراتیژییه‌تا نوى، فولكس گۆت "هاریكارێن بایدنى دبینن كو ده‌ركه‌فتنا كێمتر پتر مفایێ خۆ هه‌یه ژ خڕڤه‌بوونێن مه‌زن"، وه‌كى تۆڕا NBC News ئاماژه‌پێكرى.
فولكس دبێژیت "هه‌وا بانگه‌شه‌یێ یا مه باوه‌ریێ ب كوالێتییێ و نه‌ك چه‌ندایه‌تییێ دئینیت".
تۆڕا ئێن بى سى نیۆز دیاركریه "وێ ستراتیژییێ ئه‌و رۆخساره هه‌بوویه كو هه‌وا هه‌لبژارتنان یا بایدنى ڤیایه دیاربوونا ئاشكرا یا بایدنى كێمبكه‌ت، ئه‌ڤ چه‌نده ژ به‌ر نیگه‌رانییێ ژ ئه‌نجامدانا بایدنى بۆ شاشییان كو به‌رى نوكه ده‌مێ بایدنى ب درێژى دئاخفتى هنده‌ك شاشییێن د ئاخفتنێ دا ئه‌نجامدابوون یان ژى ژ تێكستێ به‌رهه‌ڤكرى دویركه‌فتبوو یان ژى به‌رسڤا ئێك ژ په‌یامنێران دابوو ده‌مێ ئه‌و چه‌نده نه پشكه‌ك ژ پلانێ بووى".
هه‌ڤڕكییه‌كا مه‌زن دێ دناڤبه‌را جۆ بایدن سه‌رۆكێ نوكه و به‌ربژارێ دیمۆكراتان و دۆنالد ترامپ سه‌رۆكێ به‌رێ یێ ئه‌مریكا و به‌ربژارێ كۆمارییان د هه‌لبژارتنێن سه‌رۆكاتییا ئه‌مریكا دا كو ل به‌ره د هه‌یڤا چرییا دوێ یا بهێت دا برێڤه‌بچن، دێ هه‌بیت.
