چارچووڤه‌یێ هه‌ماهه‌نگییێ داخوازییه‌كێ ژ لایه‌نێن سوننى ل دۆر پۆستێ سه‌رۆكێ په‌رله‌مانى دكه‌ت
بەلاڤ بکە
گاڤ
چارچووڤه‌یێ هه‌ماهه‌نگییێ رژدییا خۆ ل سه‌ر گرێدانا روینشتنا په‌رله‌مانێ ئیراقێ بۆ هه‌لبژارتنا سه‌رۆكه‌كێ نوى بۆ په‌رله‌مانێ د ده‌مێ حه‌فتییه‌كێ دا راگه‌هاند.
چارچووڤه‌یێ هه‌ماهه‌نگییێ د به‌یانه‌كێ دا ئه‌ڤرۆ دوشه‌مبییێ دیاركر "داخواز ژ فراكسیۆنێن سوننى دكه‌ین به‌رپرسیارییا خۆ وه‌ربگرن ل دۆر ڤالابوونا پۆستێ سه‌رۆكێ په‌رله‌مانى د ده‌مێ حه‌فتییه‌كێ دا كو پۆسته‌كێ سه‌ره‌كى یه د پرۆسێسا سیاسى دا".
چارچووڤه‌ى هه‌روه‌سا رژدییا خۆ ل دۆر "گرێدانا روینشتنا هه‌لبژارتنا سه‌رۆكێ په‌رله‌مانى پشتى ب دویماهیك هاتنا مووله‌تا حه‌فتییه‌كێ ژ بۆ ته‌مامكرنا وێ ئیستیحقاقا گرنگ و خۆبه‌رهه‌ڤكرن بۆ ده‌نگدانێ ل سه‌ر خشته‌یێن بودجه‌یا سالا 2024" دوپاتكر.
محه‌مه‌د حه‌لبووسى سه‌رۆكێ پارتا ته‌قه‌دوم ل ئه‌ینییا بۆرى راگه‌هاند بوو كو پۆستێ سه‌رۆكێ په‌رله‌مانى ئیستیحقاقا سیاسى و یا هه‌لبژارتنایه بۆ پارتا ته‌قه‌دوم.
د به‌رانبه‌ر دا، هه‌ر سێ هه‌ڤپه‌یمانیێن دى یێن سوننى هه‌ر ئێك ژ عه‌زم و سیاده و حه‌سما نیشتیمانى ئه‌ڤرۆ دوشه‌مبییێ د به‌یانه‌كێ دا داخوازكرن ب زویترین ده‌م روینشتنا په‌رله‌مانێ ئیراقێ بۆ هه‌لبژارتنا سه‌رۆكه‌كێ نوى بۆ په‌رله‌مانى برێڤه‌بچیت.
په‌رله‌مانێ ئیراقێ ل ناڤه‌راستا هه‌یڤا چرییا دوێ یا سالا بۆرى ب پشتبه‌ستن ب بڕیاره‌كا دادگه‌ها فیدرالى، ئه‌ندامه‌تییا محه‌مه‌د حه‌لبووسى د په‌رله‌مانى دا پشتى سكالایه‌كا له‌یس دلێمى په‌رله‌مانتارێ به‌رێ ل سه‌ر وى ب دویماهیك ئینابوو.
په‌رله‌مانێ ئیراقێ ل رۆژا 13ى هه‌یڤا كانوینا دوێ یا بۆرى روینشتنا هه‌لبژارتنا سه‌رۆكێ په‌رله‌مانى ئه‌نجامدابوو و د گه‌ڕا ئێكێ یا ده‌نگدانێ دا چ ژ به‌ربژاران پڕانییا ره‌ها یا پێدڤى بده‌ستڤه‌نه‌ئینابوون و به‌رى گه‌ڕا دوێ یا ده‌نگدانێ بهێته ئه‌نجامدان، روینشتن هاتبوو هه‌لگرتن، د گه‌ڕا ئێكێ یا ده‌نگدانێ دا شه‌علان كره‌یم به‌ربژارێ پارتا ته‌قه‌دوم پترین ده‌نگ بده‌ستڤه‌ئینابوون و ل دویڤ دا سالم عیساوى هاتبوو، ل دویڤ دا و ل رۆژا 17ى نیسانا بۆرى، شه‌علانى خۆڤه‌كێشانا خۆ ژ هه‌ڤڕكییا پۆستێ سه‌رۆكێ په‌رله‌مانى راگه‌هاند بوو و تا نوكه ژ به‌ر نه‌بوونا رێككه‌فتنێ پۆستێ سه‌رۆكێ په‌رله‌مانێ نه‌هاتیه ئێكلاكرن.
