گاڤ – تایبەت
رێڤەبەرێ گشتى یێ باژێرڤانییان ل پارێزگەها دهۆکێ بۆ گاڤ راگەهاند: رێکارێن تەکنیکى یێن بەلاڤکرنا پارچە زەڤیان ل پارێزگەها دهۆکێ دەستپێکرییە و ئەو ل هیڤییا رێنمایێن جڤاتا وەزیرانە.
دیار بەحرى، رێڤەبەرێ گشتى یێ باژێرڤانییان ل پارێزگەها دهۆکێ تایبەت بۆ گاڤ گۆت: پرۆسەیا بەلاڤکرنا پارچە زەڤیان ل پارێزگەها دهۆکێ ژ رێکارێن تەکنیکى دەستپێکرییە و وان هەمى باژێرڤانییێن سنۆرێ پارێزگەهێ راسپاردینە کو عەردێ پێدڤى ل سنۆرێن خۆ ئێطفا بکەن و گەر پێدڤى کر رەگەزێ وان عەردان بگهۆرن، داکو بۆ بەلاڤکرنێ د ئامادەبن.
گۆت ژى: تا نوکە ژمارەیا دروست یا پارچە زەڤییێن دهێنە بەلاڤکرن یا دیار نینە، ئەو ل هیڤییا رێنمایێن جڤاتا وەزیرانە، داکو بزانن مەرج ژ کێ دگرن، هەر دەما رێنمایی گەهشتن، دێ لیستەکا ئێکگرتى ب سەر هەمى فەرمانگەهێن حکومەتێ دا هێتە بەلاڤکرن و هینگێ دێ دیاربیت کا چەند فەرمانبەر دێ مفاداربن.