سهرۆكێ ههرێما كوردستانێ ل گهل سهرۆكێ پهڕلهمانێ ئیرانێ كۆمبوو
گاڤ
سهرۆكێ ههرێما كوردستانێ ل گهل سهرۆكێ جڤاتا شوورایا ئیسلامى (پهڕلهمانێ ئیرانێ) كۆمبوو، دوپاتى ل گرنگییا ههبوونا پهیوهندیێن باش یێن ئیراق و ههرێما كوردستانێ ل گهل ئیرانێ كرن.
سهرۆكایهتییا ههرێما كوردستانێ راگههاند، د رۆژا دووێ یا سهرهدانا خۆ یا فهرمى بۆ تههرانێ دا، ئهڤرۆ سپێدێ 7-5-2024ێ نێچیرڤان بارزانى، سهرۆكێ ههرێما كوردستانێ ل گهل محهمهد باقر قالیباف، سهرۆكێ جڤاتا شوورایا ئیسلامى (پهڕلهمانێ ئیرانێ) كۆمبوو.
ههر دو ئالییان داكۆكى ل سهر گرنگییا ههبوونا پهیوهندیێن باش یێن ئیراق و ههرێما كوردستانێ ل گهل كۆمارا ئیسلامى یا ئیرانێ ل سهر بنهمایێ جیرانییهكا باش و پهیوهندیێن ههڤپشك كر، د ڤى وارى دا بهحس ل دهلیڤه و چاوانییا بهردهومیدان ب ههموو وارێن پهیوهندى و ههڤكارییا ههڤپشك د ناڤبهرا ههر دو ئالیان دا هاتهكرن.
ههر دو ئالى ههڤڕابوون د وارێن بازرگانى، ئابۆرى، وهبهرهێنان، چاندن، گهشتیارى، كلتۆرى، پهروهردهیى، زانكۆیى و چهندین وارێن دى دا، ههروهسا بهحس ل زهمینهسازى و دهلیڤهیێن زێدهتر یێن هاریكارییا ههڤپشكا كۆمارا ئیسلامى یا ئیرانێ ل گهل ئیراق و ههرێما كوردستانێ كر و دیاركرن، بۆ ڤێ مهرهمێ ژى گرنگه ئالیێن پهیوهندیدارێن كارهكێ زێدهتر بكهن.
سهرۆكێ ههرێمێ و سهرۆكێ پهڕلهمانى رهوشا گشتى یا ئیراق و ههرێما كوردستانێ و پهیوهندیێن ههلێر و بهغدایێ ژى بهحسكرن.