گاڤ

سەرۆکێ هەرێما کوردستانێ پشتی کۆمبوونێن وی ل ئیرانێ ب دویماهی هاتین، ناڤەرۆکا کۆمبوونان ئاشکرا کر.

نێچیرڤان بارزانی، سەرۆکێ هەرێما کوردستانێ ل تەهرانێ د کۆنگرەیەکێ رۆژنامەڤانی دا راگەهاند: کۆمارا ئیسلامی یا ئیرانێ بۆ هەرێما کوردستانێ هەڤسۆیەکا گرنگە و ل بەرتەنگییان هاریکارییا هەرێما کوردستانێ کرییە.

هەرێما کوردستانێ و سەقامگیرییا دەڤەرێ

سەرۆک نێچیرڤان بارزانی دوپاتی ل رۆلێ هەرێما کوردستانێ د پاراستنا ئاشتی و سەقامگیرییا دەڤەرێ دا کر و گۆت: هەرێما کوردستانێ دێ فاکتەرێ نەگۆر یێ پاراستنا سەقامگیرییا دەڤەرێ بیت و ئەم ب چ رەنگان قەبویل ناکەین چ گرۆپێن چەکدار ژ هەرێما کوردستانێ هێرش بکەنە سەر ئیرانێ یان هەر وەلاتەکێ دی یێ هەڤسۆ ل گەل هەرێما کوردستانێ.

چەندین کۆمبوونێن نهێنی هاتینە کرن

دەربارەی پەیوەندییێن هەرێما کوردستانێ و بەغدا و هەروەسا کێشەیێن د ناڤبەرا هەولێرێ و بەغدایێ دا، سەرۆک نێچیرڤان بارزانی گۆت: ل مەهێن بۆری وان چەندین کۆمبوونێن نهێنی ل گەل محەمەد شیاع سوودانی، سەرۆکوەزیرێ ئیراقێ کرینە و سوودانی د رێکخستنا ڤێ سەرەدانێ بۆ ئیرانێ هاریکاری کرییە. هەروەسا وان د کۆمبوونێن ل گەل ئالییێن ئیراقی دا دوپات کرییە کو نابیت مووچەیێ مووچەخۆرێن هەرێما کوردستانێ ببیتە پشکەک ژ کێشەیێن د ناڤبەرا حکومەتا هەرێمێ و حکومەتا فیدرال دا.

بەرژەوەندییێن هەرێمێ د سەر بەرژەوەندییێن حزبان دانە

نێچیرڤان بارزانی، سەرۆکێ هەرێما کوردستانێ د کۆنگرەیێ رۆژنامەڤانی دا بەحسا هەلبژارتنێن پەرلەمانێ کوردستانێ ژی کر و گۆت: بابەتێ هەلبژارتنێن پەرلەمانێ کوردستانێ د ناڤەرۆکا کۆمبوونێن وان یێن ئیرانێ دا نەبوو و هەرچەندە تا نوکە ژڤانێ هەلبژارتنان نەهاتییە گوهۆڕین، لێ پێدڤییە هەلبژارتن ب رێککەفتنا ئالییێن سیاسی بهێنە کرن.

سەرۆکێ هەرێما کوردستانێ دەربارەی کێشەیێن د ناڤبەرا ئالییێن سیاسی یێن هەرێمێ دا، بێلایەنییا خۆ یا حزبی دیارکر و گۆت: ئەو دێ وەک سەرۆکێ هەرێما کوردستانێ بەرژەوەندییێن هەرێما کوردستانێ پارێزیت. مافێ حزبێن سیاسی یە بەرژەوەندییێن تایبەت هەبن، لێ بەرژەوەندییێن هەرێما کوردستانێ د سەر بەرژەوەندییێن حزبێن سیاسی دانە.

قووناغەکا نوی یا پەیوەندییان ل گەل ئیرانێ دەستپێ دکەت

دەربارەی مەلەفێن ئەمنی، سەرۆک نێچیرڤان بارزانی راگەهاند: رێبەر ئەحمەد، وەزیرێ ناڤخۆ یێ هەرێما کوردستانێ هەلگرێ وی مەلەفی بوو و د کۆمبوونێن وان یێن ئیرانێ دا پشکداربوو و دانوستاندن ل سەر چارەکرنا کێشەیێن گرێدایی وی مەلەفی ژی هاتینە کرن.

سەرۆک نێچیرڤان بارزانی بەحس ل دەستپێکرنا قووناغەکا نوی یا پەیوەندییان ل گەل ئیرانێ کر و گۆت: قووناغەکا نوی یا پەیوەندییان دێ د ناڤبەرا هەرێما کوردستانێ و ئیرانێ دا دەستپێ کەت، لێ ئەو نوکە ناڤەرۆک و هویرکاتییێن وێ قووناغێ بەحس ناکەن.

بەرپرسێن ئیرانی سوپاسییا خەلکێ کوردستانێ کر

دەربارەی پێشوازییا ل ئیرانێ ل وان هاتییە کرن، سەرۆکێ هەرێما کوردستانێ پەسنا پێشوازییا بەرپرسێن ئیرانی ل شاندا هەرێمێ کر و راگەهاند: بەرپرسێن ئیرانی سوپاسییا خەلک و حکومەتا هەرێما کوردستانێ، ب تایبەت خەلکێ کوردستانێ کر، ل پێشوازییا وان ل حەجییێن ئیرانی کری یێن ب مەبەستا سەرەدانا کەربەلا د هەرێما کوردستانێ را چووین.