گاڤ

د چارچووڤێ سەرەدانا خۆ دا بۆ کامارا ئیسلامی یا ئیرانێ، ئەڤرۆ سەرۆک نێچیرڤان بارزانی ل گەل جەنەرال حسێن سەلامی، فەرماندارێ گشتییێ سوپایێ پاسدارێن ئیرانێ کۆمبوو.

ل گۆرەی بەیانەکا سەرۆکاتییا هەرێما کوردستانێ، د کۆمبوونێ دا پەیوەندییێن ئیراق و هەرێما کوردستانێ ل گەل ئیرانێ، تایبەت د وارێ ئەمنی دا هاتنە بەحسکرن. هەردو ئالییان دوپاتی ل گرنگییا بهێزکرنا هاریکاری و هەماهەنگییا ئالییێن پەیوەندیدار یێن کۆمارا ئیسلامی ل گەل ئیراق و هەرێما کوردستانێ کر بۆ پاراستنا ئاسایش و ئارامییا سنۆری و بەرهنگاربوونا گەفێن ئەمنی ژ هەمی ئالییان ڤە.

هەروەسا هاتییە، د تەوەرکێ دی یێ کۆمبوونێ دا کاریگەرییێن شەر و ئالۆزییێن رۆژهەلاتا ناڤین ل سەر رەوشا دەڤەرێ ژی بەحسکرن. دەربارەی ڤێ هەردو ئالی هەڤرابوون ل سەر وێ یەکێ کو پێدڤییە هەمی ئالی ژ پێخەمەت پاراستنا سەقامگیرییێ کار بکەن و رێکێ نەدەن ئالۆزی پتر زێدەببن.