گاڤ - تایبەت
ژڤانێ هەلبژارتنێن پەرلەمانێ کوردستانێ نێزیک دبیت و سەرۆکێ بەرێ یێ کۆمسیۆنا هەلبژارتنێن ئیراقێ بۆ گاڤ دبێژیت: دبیت هەلبژارتن بهێنە پاشخستن و ل مەها دەهـ ژی نەهێنەکرن.
سەربەست ئامێدی، سەرۆکێ تۆڕا چاڤ یا چاڤدێرییا دیمۆکراسی و مافێن مرۆڤی و سەرۆکێ بەرێ یێ کۆمسیۆنا ئیراقێ بۆ گاڤ گۆت: ئەگەر هەلبژارتنێن پەڕلەمانێ کوردستانێ ل دەهی خزیرانێ نەهێنەکرن، ل تیرمەها ئەڤ سالە دێ دەمێ کۆمسیۆنا هەلبژارتنان ب سەرڤەچیت و ئەڤە دێ بیتە ئەگەر هەلبژارتن زێدەتر بهێنە پاشخستن، ژبەرکو کاراکرنا کۆمسیۆنێ دەم دڤێت.
سەربەست ئامێدی دەربارەی رێکێن کاراکرنا کۆمسیۆنێ دبێژیت: پەرلەمانێ ئیراقێ دەستهەلات هەنە کۆمسیۆنێ کارا بکەت، لێ کێشە ل ڤێرێ ئەوە ل حەفتییا بهێت بێهنڤەدانا وەرزێ هاڤینێ یا پەرلەمانی دەستپێدکەت و ئەگەر کاراکرنا کۆمسیۆنێ بمینیتە ل ژڤانێ ب دویماهیهاتنا بێهنڤەدانا پەرلەمانی، هەلبژارتن ل مەها دەهـ ژی ناهێنەکرن، ژبەرکو بێهنڤەدانا پەرلەمانێ ئیراقێ ل ناڤەراستا مەها تەباخێ ب دویماهی دهێت.
دەربارەی رێکێن پێگهۆڕ، سەربەست ئامێدی گۆت: ئەنجوومەنێ دادوەری یێ ئیراقێ دەستهەلات هەنە بێی پەرلەمان، دادوەرێن جڤاتا کۆمیسارێن ئیراقێ بگوهۆڕیت، لێ چارچووڤەیێ هەماهەنگییێ کو نوکە بهێزترین هەڤپەیمانییا سیاسی یە ل ئیراقێ، ل گەل گوهۆڕینا دادوەرێن جڤاتا کۆمیسەران نینە.