گاڤ – تایبەت

پتری 30 سالانە تورکیا و ئیران ب بەهانەیێن جودا هێرش دکەنە چەندین دەڤەرێن هەرێما کوردستانێ، د وان هێرشان دا پتری 850 وەلاتییێن هەرێما کوردستانێ شەهید بووینە و بزاڤەک هەیە کەسوکارێن وان شەهیدان بهێنە قەرەبۆکرن.

رێکخراوا CPT یا ئەمریکی ب هاریکارییا دەستەیا مافێن مرۆڤی یا هەرێما کوردستانێ راپۆرتەکا بەرفرەهـ دەربارەی وەلاتییێن ل هەرێما کوردستانێ ژ ئەگەرێ هێرشێن تورکیا و ئیرانێ بووینە قوربانی، بەلاڤ کرییە. کامەران ئۆسمان، بەرپرسێ پشکا مافێن مرۆڤی ل وێ رێکخراوا ئەمریکی بۆ گاڤ گۆت: ژ سالا 1990ێ تا ئەڤ سالە، پتر ژ 850 وەلاتییێن هەرێما کوردستانێ د هێرشێن تورکیا و ئیرانێ دا شەهید بووینە، پتریا وان ژی ل سنۆرێ پارێزگەها دهۆکێ بووینە و ژ ئەگەرێ شەڕێ د ناڤبەرا تورکیا و پەکەکێ دا بووینە قوربانی.

ژێدەری هەروەسا دیار کر: وان د راپۆرتەکا بەرفرەهـ دا، ناڤ و زانیارییێن وان کەسێن بووینە قوربانی، تۆمار کرینە و دێ داخوازا قەرەبۆکرنا مالباتێن وان ژ بەغدایێ کەن.

ل گۆرەی راپۆرتا وێ رێکخراوا ئەمریکی و دەستەیا مافێن مرۆڤی یا هەرێما کوردستانێ، ژ ئەگەرێ بەردەوامییا شەڕێ تورکیا و پەکەکێ، 161 گوندێن هەرێما کوردستانێ ب تەمامی هاتینە چۆلکرن و ترس هەیە 602 گوندێن دی چۆل ببن.