گاڤ

په‌یڤدارێ حكومه‌تا هه‌رێما كوردستانێ راگه‌هاند؛ د ده‌مێ 15 رۆژان دا دێ دانوستاندنێن ب هه‌میشه‌ییكرنا فه‌رمانبه‌رێن گرێبه‌ست دناڤبه‌را هه‌رێما كوردستانێ و حكومه‌تا فیدرالى دا برێڤه‌چن، ئاماژه‌ ب وێ چه‌ندێ ژى كر كو د نوكه‌ دا چ ئاسته‌نگ به‌رانبه‌ر هنارتنا مووچه‌یێن فه‌رمانبه‌رێن هه‌رێمێ نینن.

پێشه‌وا هه‌ورامانى په‌یڤدارێ حكومه‌تێ به‌رى ده‌مه‌كێ كێم دیاركر "حكومه‌تا هه‌رێمێ بزاڤان دكه‌ت فه‌رمانبه‌رێن گرێبه‌ست ب هه‌میشه‌یى بكه‌ت".

راگه‌هاند ژى؛ تیمه‌ك هاتیه‌ پێكئینان كو بۆ ده‌مێ 15 رۆژان دێ پۆلینكرنا فه‌رمانبه‌رێن گرێبه‌ست یێن هه‌رێمێ ئه‌نجامده‌ت و دێ گۆتوبێژان ل گه‌ل به‌غدا بۆ ب هه‌میشه‌ییكرنا فه‌رمانبه‌رێن گرێبه‌ست كه‌ت.

دیار ژى كر "پتر ژ 30 هزار فه‌رمانبه‌رێن گرێبه‌ست ل هه‌رێما كوردستانێ هه‌نه‌".

زێده‌تر ژى گۆت "مه‌ نه‌گۆتییه‌ مه‌ دوژمناتى ل گه‌ل ته‌وتینێ هه‌یه‌ و د دویماهییێ دا هه‌ژمارى من و ته‌وتینێ ئێك ئه‌نجام هه‌بوویه‌ و د نوكه‌ دا به‌نكا بازرگانى یا ئیراقێ TBI هاتیه‌ دناڤ پرۆژه‌یێ هه‌ژمارى من دا".

دیار ژى كر "د نوكه‌ دا چ ئاسته‌نگ به‌رانبه‌ر هنارتنا مووچه‌یێن فه‌رمانبه‌رێن هه‌رێمێ نینن كو به‌رى نوكه‌ دو ئاسته‌گ هه‌بوون ئه‌و ژى داهاتێ ناڤخۆ و بابه‌تێ به‌نكێ بوون و د نوكه‌ دا هه‌ردو هاتنه‌ چاره‌كرن، مه‌ پێگیریێن خۆ بجهئیناینه‌ و چاڤه‌رێى هنارتنا مووچه‌یان دكه‌ین".

گۆت ژى "حكومه‌تا هه‌رێمێ بزاڤان دكه‌ت گه‌نمێ جۆتیارێن هه‌رێما كوردستانێ وه‌كى ده‌ڤه‌رێن دى یێن ئیراقێ بهێته‌ وه‌رگرتن".

ل دۆر هنارده‌كرنا په‌ترۆلا كوردستانێ گۆت "تێچوویێن به‌رهه‌مئینانێ ئاسته‌نگا ئێكانه‌یه‌‌ د رێكا هنارده‌كرنێ دا".