گاڤ

سیاسەتڤانێ کورد و سەرکردەیێ ئێکەتییا نشتیمانی یا کوردستانێ مەلا بەختیار دبێژیت: سەرەدانا سەرۆک نێچیرڤان بارزانی بۆ ئیرانێ سەرەدانەکا گرنگ بوو و ئەو بەستییا کەفتییە د پەیوەندییێن هەولێر و تەهرانێ دا حەلاند.

مەلا بەختیار ئەڤرۆ ل سلێمانییێ پشکداری کۆنگرەیەکی بوو و د گۆتارەکێ دا راگەهاند: هەرێما کوردستانێ نوکە بۆ جیهانێ پێگەهەکێ تایبەت هەیە، ئیران ژی ئێک ژ وەلاتێن گرنگ یێن دەڤەرێ یە، لەورا سەرەدانا نێچیرڤان بارزانی، سەرۆکێ هەرێما کوردستانێ بۆ ئیرانێ، سەرەدانەکا گرنگ بوو و دێ بیتە دەرگەهەک بۆ دەستپێکرنا قووناغەکا نوی د پەیوەندییێن هەولێر و تەهرانێ دا.

مەلا بەختیاری هەروەسا گۆت: ئیرانێ کێشەیێن مەزن ل گەل هەرێما کوردستانێ هەبوون و کێشە گەهشتبوونە ئاستەکی کو ئیرانێ 144 جاران هەولێر ب مۆشەکان بۆمبەباران کر، لێ سەرەدانا نێچیرڤان بارزانی بۆ تەهرانێ، ئەو بەستییا کەفتییە د پەیوەندییێن ناڤبەرا هەولێر و تەهرانێ دا حەلاند.

دەربارەی گرنگییا پێگەهێ هەرێما کوردستانێ، مەلا بەختیار دبێژیت: هەرێما کوردستانێ بۆ جیهانێ پێگەهەکێ تایبەت هەیە و نوکە کوردستان دشێت د بابەتێ دابینکرنا غازێ دا بۆ ئەورۆپا ببیتە پێگوهۆڕێ رۆسیایێ.