ئه‌مریكا هه‌رێما كوردستانێ ب هه‌ڤپشكه‌كا گرنگ لقه‌له‌مدده‌ت
بەلاڤ بکە
گاڤ
ئه‌مریكا به‌رهه‌ڤییا خۆ بۆ پشته‌ڤانییا هه‌رێما كوردستانێ دوپاتكر و هه‌رێم ب هه‌ڤپشكه‌كا گرنگ یا ئه‌مریكا لقه‌له‌مدا.
نێچیرڤان بارزانى سه‌رۆكێ هه‌رێما كوردستانێ ئه‌ڤرۆ پێنجشه‌مبییێ پێشوازى ل ئه‌زرا زییا بریكارا وه‌زاره‌تا ده‌رڤه یا ئه‌مریكا بۆ كاروبارێن ئاسایشا سڤیل و دیمۆكراسى و مافێن مرۆڤى كر.
ل گۆره‌ى به‌یانه‌كا سه‌رۆكایه‌تییا هه‌رێما كوردستانێ "د كۆمبوونه‌كێ دا كو بالیۆزێ ئه‌مریكا ل ئیراقێ و ژماره‌یه‌كا به‌رپرسێن وه‌زاره‌تا ده‌رڤه یا ئه‌مریكا تێدا به‌رهه‌ڤ ببوون، دوپاتى ل سه‌ر پاراستنا مافێن مرۆڤى، پێشڤه‌برنا دیمۆكراسى و ئازادییان ل هه‌رێما كوردستانێ هاته كرن".
د به‌یانێ دا هاتیه ژى "هه‌ردو لایان دوپاتى ل سه‌ر پێشڤه‌برنا بهایێن هه‌ڤپشك و پاراستنا مافێن پێكهاته‌یێن نه‌ته‌وه‌یى و ئایینى كر".
بریكارا وه‌زاره‌تا ده‌رڤه یا ئه‌مریكا په‌سنا كولتۆرێ پێكڤه‌ژیانێ و لێبۆرینێ ل هه‌رێما كوردستانێ كر و به‌رهه‌ڤییا لایه‌نێن په‌یوه‌ندیدار یێن وه‌لاتێ خۆ بۆ هاریكارییا هه‌رێما كوردستانێ ژ بۆ پێشڤه‌برنا بوارێن مافێ مرۆڤى، ئازادی، دیمۆكراسییێ و رۆلێ یاسایی دیاركر و هه‌رێما كوردستانێ ب هه‌ڤپشكه‌كا گرنگ یا ئه‌مریكا لقه‌له‌مدا.
ره‌وشا ئێزدییان، گرنگییا بجهئینانا رێككه‌فتنا حكومه‌تا هه‌رێما كوردستانێ و حكومه‌تا فیدرالى بۆ ئاساییكرنا ره‌وشا شنگالێ، هه‌لبژارتنێن په‌رله‌مانێ كوردستانێ، ڤه‌گه‌ڕیانا ئاواره‌یان ب حه‌زا خۆ، ژیان و ژیارا ئاواره و په‌نابه‌ران د كه‌مپان دا، ژ ته‌وه‌رێن دى یێن كۆمبوونێ بوون.
