گاڤ

وه‌زیرێ باژێڕڤانییێ داخواز ژ هه‌مى باژێرڤانییان ل هه‌رێما كوردستانێ كر ژماره‌یا فه‌رمانبه‌ران و جهێن پارچه‌یێن عه‌ردى ل سه‌ر نه‌خشه‌ى دیار بكه‌ن.

ئه‌ڤرۆ پێنجشه‌مبییێ ب سه‌رپه‌رشتییا ساسان عه‌ونى وه‌زیرێ باژێڕڤانى و گه‌شتوگۆزارێ كۆمبوونا دوێ یا جڤاتا باژێڕڤانییێ ب مه‌به‌ستا ده‌ستپێكرنا گاڤێن كردارى بۆ دابه‌شكرنا پارچه‌یێن عه‌ردى ل سه‌ر فه‌رمانبه‌ران برێڤه‌چوو.

ل گۆره‌ى به‌یانه‌كا وه‌زاره‌تا باژێڕڤانی و گه‌شتوگۆزارێ "رێكارێن دابه‌شكرنا پارچه‌یێن عه‌ردى ل سه‌ر فه‌رمانبه‌ران دچیته‌ د وارێ بجهئینانێ دا".

راگه‌هاند ژى "كۆمبوون ب سه‌رپه‌رشتییا وه‌زیرێ باژێڕڤانى و گه‌شتوگۆزارێ و ب پشكدارییا شیره‌تكاران، رێڤه‌به‌رێن گشتى یێن نه‌خشه‌دانانا ئاڤه‌دانییێ و یاسایێ ل وه‌زاره‌تێ، رێڤه‌به‌رێن گشتى یێن باژێڕڤانییان، سه‌رۆكێن باژێڕڤانییان و رێڤه‌به‌رێن نه‌خشه‌دانانا ئاڤه‌دانییێ ل سه‌رجه‌م پارێزگه‌هـ و ئیداره‌یێن سه‌ربخۆ برێڤه‌چوو".

به‌یانێ دیار ژى كریه‌ "وه‌زیرێ باژێڕڤانییێ و گه‌شتوگۆزارێ دویڤچوون بۆ كارێ باژێڕڤانییان كر كو د كۆمبوونا بۆرى دا ئه‌و راسپارد بوون بۆ زانینا ژماره‌یا ته‌خمینكرى یا فه‌رمانبه‌ران و دابینكرنا عه‌ردى و نه‌خشه‌یێ عه‌ردى و دیاركرنا جهـ و گرفتێن ته‌كنیكى و یاسایی ل سنوورێ باژێڕڤانییان دا كو ل ده‌مه‌كێ زوى فه‌رمانبه‌ر ژ بڕیارا مه‌سروور بارزانى سه‌رۆكوه‌زیرێ هه‌رێمێ بۆ دابه‌شكرنا عه‌ردى مفادار ببن".

ساسان عه‌ونى وه‌زیرێ باژێڕڤانییێ دوپاتى ل سه‌ر بله‌زكرنا پرۆسێسێ كر و داخواز كر هه‌تا حه‌فتییا بهێت هه‌مى باژێڕڤانی راپۆرته‌كا ته‌مام و تێروته‌سه‌ل به‌رهه‌ڤ بكه‌ن و تێدا ژماره‌یا فه‌رمانبه‌ران و جهێن دابینكرنا عه‌ردى ل سه‌ر نه‌خشه‌ى دیار بكه‌ن.

وه‌زیرێ باژێڕڤانییێ گۆت ژى "ئه‌گه‌ر عه‌رد د سنوورێ ماسته‌ر پلانێ دا به‌رده‌ست نه‌بوو، پێدڤییه‌ ماسته‌ر پلانا باژێڕڤانییان به‌رفره‌هـ بكه‌ن و ئه‌ردى دابین بكه‌ن دا كو پترین ژماره‌یا فه‌رمانبه‌ران د وه‌رگرتنا عه‌ردى دا د مفادار بن".