گاڤ

ئه‌ندامه‌كێ لژنه‌یا دارایى د په‌رله‌مانێ ئیراقێ دا به‌حسێ ئه‌گه‌رێ ل پشت ده‌نگ نه‌دانا حكومه‌تێ ل سه‌ر خشته‌یێن بودجه‌یا سالا 2024 تا نوكه‌ و نه‌ڤرێكرنا وان خشته‌یان بۆ په‌رله‌مانى كر.

محه‌مه‌د نوورى ئه‌ڤرۆ پێنجشه‌مبییێ بۆ گاڤ دیاركر "پێدڤى بوو د روینشتنا به‌رى نوكه‌ یا جڤاتا وه‌زیران دا خشته‌یێن یاسایا بودجه‌یێ هاتبانه‌ پێشكێشكرن لێ ژ به‌ر زێده‌بوونا خه‌رجكرنا حكومى و كورتئینانا مه‌زن دناڤ بودجه‌یێ دا ئه‌ڤ چه‌نده‌ هاته‌ پاشئێخستن".

ئاماژه‌ ب وێ چه‌ندێ ژى كر "حكومه‌ت د نوكه‌ دا لێكۆلینێ ل دۆر كێمكرنا خه‌رجییێن نه‌گرنگ دكه‌ت، ئه‌ڤ چه‌نده‌ ب رێكا ئه‌نجامدانا ڤه‌گوهاستنێن دارایى و به‌رفره‌هكرنا داهاتێن دارایى یێن نه‌په‌ترۆلى هه‌روه‌سا حكومه‌ت كار ل سه‌ر كێمكرنا رێژه‌یا كورتئینانێ د بودجه‌یا گشتى یا سالا 2024 دا دكه‌ت كو پتره‌ ژ 80 تریلیۆن دیناران".

وى په‌رله‌مانتارى پێشبینیكر د روینشتنا بهێت یا جڤاتا وه‌زیران دا خشته‌یێن یاسایا بودجه‌یێ بهێنه‌ پێشكێشكرن و گۆت "ئه‌م ل هیڤییا په‌سه‌ندكرنا وان خشته‌یان و هنارتنا وان بۆ جڤاتا نوینه‌راینه‌".