گاڤ – تایبەت
ئیراقێ بریار دایە ل دویماهییا تیرمەها ئەڤ سالە کەمپێن ئاوارەیان بگریت، لێ تا نوکە ل دهۆکێ پتری 60 هزار خێزانێن ئاوارەیێن شنگالێ هەنە و رێڤەبەرییا کۆچ و کۆچبەر و بەرسڤدانا قەیرانان ل دهۆکێ گەرەنتییەکێ ددەتە ئاوارەیان.
پیر دەیان جەعفەر، رێڤەبەرێ کۆچ و کۆچبەر و بەرسڤدانا قەیرانان ل پارێزگەها دهۆکێ رەخنە ل بریارێن وەزارەتا کۆچ و کۆچبەرێن ئیراقێ گرتن و گۆت: وەزارەتێ بریار دایە ل دویماهییا تیرمەها ئەڤ سالە کەمپێن ئاوارەیان بهێنە گرتن، لێ تا نوکە ئیراقێ چ ئامادەکاری بۆ ڤەگەڕیانا وان نەکرینە، شنگال یا ئارام نینە، گرۆپێن چەکدار یێن نەشەرعی ل شنگالێ هەنە و هەر ئاوارەیێ ڤەبگەڕیت ژی، ب دروستی ناهێتە قەرەبۆکرن.
پیر دەیان دبێژیت: ئەو قەرەبۆیا کێم یا هەی ژی، حکومەتا ئیراقێ بتنێ ددەتە وان ئاوارەیان یێن د کەمپان دا دژین، ئەڤە د دەمەکی دایە کو ل پارێزگەها دهۆکێ ژ سەرجەمێ 62 هزار خێزانێن ئاوارە یێن شنگالێ، بتنێ 25 هزار خێزان د کەمپان دانە. 
پیر دەیان جەعفەر ئاوارەیێن شنگالێ پشتراست دکەت و ب رێکا گاڤ رادگەهینیت: ئیراق کەمپان بگریت یان نە، هندی ئاوارەیێن شنگالێ ل دهۆکێ بمینن، یا د شیان دا بیت حکومەتا هەرێما کوردستانێ دێ بۆ وان کەت.