"تیما دادڤانێن یارییا ریال مه‌درید و بایرن میۆنشن دو جاران شاشى د گۆلا كه‌نسلكرى یا دى لیختى دا كرینه"
بەلاڤ بکە
گاڤ
پشتى ده‌ربازبوونا ریال مه‌درید بۆ یارییا دویماهییێ ژ چامپیۆنز لیگێ، هنده‌ك بڕیارێن تیما دادڤانان یا یارییێ تا نوكه بووینه جهێ بگروڤه‌كێشێ.
دوهى ریال مه‌درید ل یاریگه‌ها خۆ د یارییا هاتنێ یا قووناغا به‌رى دویماهییێ یا چامپیۆنز لیگێ دا ب ئه‌نجامێ 2-1 سه‌ركه‌فتن ل سه‌ر بایرن میۆنشن تۆماركربوو، ل ده‌مه‌كێ یارییا ئێكێ ب وه‌كهه‌ڤییا ب ئه‌نجامێ 2-2 ب دویماهیك هاتبوو.
ماتیاس دى لیخت به‌رگریكارێ بایرن میۆنشن د ده‌مێ زێده‌كرى یێ یارییێ دا گۆلا وه‌كهه‌ڤییێ تۆماركربوو ده‌مێ ئه‌نجام 2-1 د به‌رژه‌وه‌ندییا ریال مه‌درید دا بووى، لێ گۆل ژ لایێ دادڤانان ڤه نه‌هاته هژمارتن پشتى بڕیار داین كو ئۆفساید هه‌بوو.
د راپۆرته‌كا سكاى نیوز یا عه‌ره‌بى دا هاتیه "تیما دادڤانان دو جاران شاشى كرن، جارا ئێكێ ده‌مێ هاریكارێ دادڤانێ ئالایێ ئۆفسایدێ بلندكرى، ل ده‌مه‌كێ ل گۆره‌ى یاسایا نوى د حاله‌تێ یاریكه‌ر نێزیكى ئێكدو بن دا، پێدڤییه هاریكارێ دادڤانى ئالایێ ئۆفسایدێ بلند نه‌كه‌ت هه‌تا هێرش ب دویماهیك دهێت دا كو ب شاشییه‌كا ته‌خمینكرنێ یارییێ نه‌راوه‌ستینیت".
دیار ژى كریه "شاشییا دوێ ژ دادڤانێ یارییێ سیمۆن مارچینیاك بوو ئه‌وێ به‌رى ب دویماهیك هاتنا هێرشێ فیرك لێداى و یارى راوه‌ستاندى و هه‌بوونا ئوفسایدێ راگه‌هاندى كو ژ به‌ر لێدانا وى بۆ فیركێ به‌رى چوونا ته‌په‌یێ بۆ دناڤ گۆلێ دا، دادڤان نه‌شیا په‌نایێ بۆ ته‌كنیكا VAR ببه‌ت و دوباره ته‌ماشه‌ى گرته‌یێ بكه‌ت، ئانكۆ گۆل ژ به‌ر راوه‌ستاندنا یارییێ نه‌هاته هژمارتن و نه‌ك ژ به‌ر هه‌بوونا حاله‌تێ ئۆفسایدێ".
