گاڤ

لێكۆلینه‌كا ساخله‌مییێ یا نوى ئاشكرا كریه‌؛ نڤستنا كێم مه‌ترسییا تووشبوونێ ب نه‌خۆشییا شه‌كرێ زێده‌ دكه‌ت.

لێكۆلینه‌كا ساخله‌مییێ یا نوى ئاشكرا كریه‌؛ ئه‌و كه‌سێن كێمتر ژ 5 ده‌مژمێران شه‌ڤانه‌ دنڤن پتر مه‌ترسییا تووشبوونێ ب نه‌خۆشییا شه‌كرێ ژ جۆرێ دوێ ل سه‌ر وان هه‌یه‌ ب هه‌ڤبه‌ركرن ل گه‌ل وان كه‌سێن 7 بۆ 8 ده‌مژمێران هه‌ر شه‌ڤ دنڤن.

مالپه‌رێ Healthline دیاركریه‌ "نڤستن بۆ ده‌مژمێرێن پێدڤى یا گرنگه‌ ژ بۆ پاراستنا ساخله‌مییا گشتى و ئه‌نجامدانا ئه‌ركان".

خۆیا ژى كریه‌ "كه‌سێن پێگه‌هشتى پێدڤى ب 7 تا 9 ده‌مژمێرێن نڤستنێ نه‌ شه‌ڤانه‌ بۆ كێمبوونا مه‌ترسییا تووشبوونێ ب نه‌خۆشییا شه‌كرێ".

كێم نڤستن گه‌له‌ك جاران دبیته‌ ئه‌گه‌رێ ره‌فتارێن خوارنێ یێن نه‌ساخله‌م هه‌روه‌سا زێده‌بوونا خوارنا وان خوارنێن گه‌له‌ك كالۆرى د ناڤ دا د درێژییا رۆژێ دا و ئه‌ڤ چه‌نده‌ دبیته‌ ئه‌گه‌رێ زێده‌بوونا كێشا له‌شى و پاشى زێده‌بوونا مه‌ترسییا تووشبوونێ ب نه‌خۆشییا شه‌كرێ.

هه‌روه‌سا نه‌نڤستن دبیته‌ ئه‌گه‌رێ كێمبوونا هه‌ستیارییا ئه‌نسۆلینێ كو له‌شێ مرۆڤى زه‌حمه‌تێ دبینیت بۆ بكارئینانا ئه‌نسۆلینێ ب شێوه‌یه‌كێ ئه‌كتیڤ و ئه‌ڤ چه‌نده‌ دبیته‌ ئه‌گه‌رێ زێده‌بوونا ئاستێن گلوكۆزێ و ره‌نگه‌ ئاماژه‌یه‌ك بیت بۆ ده‌ستپێكا نه‌خۆشییا شه‌كرێ.

هه‌روه‌سا كێم نڤستن كارتێكرنه‌كا نه‌رێنى ل سه‌ر كارێ هنده‌ك هۆرمانان دناڤ له‌شى دا دكه‌ت.