گاڤ

سوپاسالارێ پێشتر یێ ئەمریکا د داخۆیانییەکێ دا دەربارەی کوشتنا سڤیلان ل غەززە، راگەهاند: ئەمریکا ژی پێشتر د شەڕان دا گەلەک سڤیل کوشتینە.

مارک مێلی، سوپاسالارێ پێشتر یێ ئەمریکا ل دەما پشکدارییێ د پیشانگەهەکا ژیرییا دەستکرد دا و د بەرسڤا پرسیارەکا گرێدایی کوشتنا نێزیکی 35 هزار سڤیلان ل غەزە دا گۆت: کوشتنا سڤیلان جهێ دلگرانییەکا مەزنە، لێ نابیت ئەو ئەمریکا د بابەتێ کوشتنا سڤیلان دا ب بێگونەهـ ناڤ بکەن.

سوپاسالارێ پێشتر یێ ئەمریکا گۆت ژی: ئەمریکا نێزیکی 12 هزار فەرەنسییێن سڤیل کوشتینە، هەروەسا ل ژاپۆنێ ژی ژبلی هێرۆشیما و ناکازاکی، 69 باژێڕ وێران کربوون و ل ئیراقێ و سووریێ ژی گەلەک سڤیل ل مووسلێ و رەقە کوشتینە.

دەربارە شەڕان ژی، مێلی گۆت: شەڕ کارەکێ باش نینە، لێ ئەگەر ئارمانجەکا سیاسی و ئەخلاقی ل پشت بیت، پێدڤییە پلان هەبن کو شەڕ زوی ب دویماهی بهێن.