گاڤ

حکومەتا ئیراقێ ب فەرمی داخواز ژ نەتەوەیێن ئێکگرتی کر ئەرکێ یۆنامییێ ل ئیراقێ ب دویماهی بینیت و راگەهاند: ئیراقێ نوکە شیان هەنە پشتبەستنێ ل سەر خۆ بکەت.

ل سالا 2003یێ پشتی ئازادییا ئیراقێ، نەتەوەیێن ئێکگرتی تیمەکا تایبەت بۆ هاریکارییا ئیراقێ دامەزراند، ئەو تیم ب ناڤێ یۆنامی یە و ب رەنگەکێ ئێکسەر ب سکرتێرێ گشتی یێ نەتەوەیێن ئێکگرتی و جڤاتا ئاساییشا نێڤدەولەتی ڤە گرێدایی یە.

محەمەد شیاع سوودانی، سەرۆکوەزیرێ ئیراقێ نامەیەک بۆ ئەنتۆنیۆ گۆتیرێز، سکرتێرێ گشتی یێ نەتەوەیێن ئێکگرتی هنارتییە و تێدا نڤیسییە: پشتی پتری 20 سالان ژ ئەرکێن یۆنامییێ ل ئیراقێ و هاریکارییا وێ یا بەردەوام بۆ ئیراقێ، وان باوری هەیە نوکە دەم هاتییە ئەرکێن وێ ل ئیراقێ ب دویماهی بهێن، ژبەر کو ئیراقێ پێشکەفتنەکا باش ب خۆڤە دیتییە و نوکە دشێت پشتبەستنێ ل سەر خۆ بکەت.

سوودانی د نامەیا خۆ دا داخواز کرییە: ئامادەباشی بهێنە کرن تاکو 1-1-2025ێ ئەرکێن یۆنامییێ ل ئیراقێ ب تەمامی ب دویماهی بهێن و هیڤییا سەرکەفتنێ بۆ جێنین پلاسخارت، هنارتییا تایبەت یا نەتەوەیێن ئێکگرتی بۆ ئیراقێ د ئەرکێن وێ یێن بهێن دا خواستییە.