گاڤ

ئەڤرۆ سپێدێ هەلبژارتنێن پەرلەمانێ بریتانیا دەستپێکرینە و پارتییا پارێزگار یا دەستهەلاتدار و پارتییا کار، د هەڤڕکییەکا دژوار دانە.

ئەڤرۆ سپێدێ ل دەمژمێر 6:00 دەرگەهێن بنگەهێن دەنگدانێ بۆ دەنگدەرێن بریتانی هاتینە ڤەکرن، ل سەرتاسەری بریتانیا نێزیکی 40 هزار بنگەهێن دەنگدانێ هەنە و گرنگییا ڤان هەلبژارتنان د وێ یەکێ دایە کو ئێکەم هەلبژارتنێن پەرلەمانی نە پشتی بریتانیا ژ ئێکەتییا ئەورۆپی دەرکەفتی.

د ڤان هەلبژارتنان دا، پارتییا کار یا بریتانی ب سەرکردایەتییا کیێر ستارمەر، پارێزەرێ مافێ مرۆڤی یێ پێشتر و سەرکردەیێ دیار یێ پارتییا کار یێ نوکە، ب رەنگەکێ دیار هاتییە پێش و پترییا راپرسییان بەر ب وێ یەکێ دچن کو پارتییا کار بشێت دویماهییێ ب 14 سالێن دەستهەلاتا پارتییا پارێزگار یا بریتانی بینیت.

ریشی سۆناک، سەرۆکوەزیرێ نوکە یێ بریتانیا و سەرکردەیێ پارتییا پارێزگار، هەر سپێدێ زوی چوو دەنگێ خۆ دا و داخواز ژ دەنگدەران کر بچن دەنگێن خۆ بدەن.

پارتییا کار یا بریتانی د بانگەشەیا هەلبژارتنان دا گەلەک سۆز داینە، لێ ژمارەکا چاڤدێران وەسا دبینن کو ئەگەر د هەلبژارتنان دا سەربکەڤن و حکومەتێ پێک بینن ژی، ئەو نەشێن پشتەڤانییا دارایی یا پێدڤی بۆ بجهئینانا وان هەموو سۆزان بدەستڤە ببەن.