سه‌رۆك مه‌سعوود بارزانى دوهى رۆژا چارشه‌مبى د سه‌ره‌دانه‌كێ دا گه‌هشته‌ به‌غدایێ و زنجیره‌كا كۆمبوونێن چاره‌نڤیساز دگه‌ل سه‌ركرده‌ و ئالیێن فه‌رمى یێن ئیراقێ كرن. ئالیێن ئیراقى، كونسۆلێن وه‌لاتان و چاڤدێرێن سیاسى سه‌ره‌دانێ ب گرنگ و ئاماژه‌یه‌ك دبینن بۆ ب دویماهیهاتنا كێشه‌یێن دناڤبه‌را هه‌ولێر و به‌غدایێ دا و ده‌ستپێكرنا قویناغه‌كا نوى.
ل گۆره‌ى چاڤدێرێن سیاسى یێن ئیراقى، سه‌ره‌دانا سه‌رۆك بارزانى كو ب بابێ سیاسه‌تا ئیراقێ دزانن، پشكدارییا وى د كۆمبوونا هه‌ڤپه‌یمانییا ئیداره‌یا ده‌وله‌تێ دا گه‌رماتییه‌كا نوى دایه‌ پرۆسه‌یا سیاسى یا ئیراقێ ژ ئالییه‌كێ ڤه‌ چاره‌كرنا ناكۆكیێن ئالیان لسه‌ر هژماره‌كا باده‌ك و دۆسیه‌یان ب تایبه‌تى كێشه‌یێن دناڤبه‌را هه‌ولێر و به‌غدایێ و هه‌روه‌سا ئالیێن ئیراقى په‌نا بۆ سه‌رۆك بارزانى برینه‌ بۆ چاره‌كرنا كێشه‌یێن دناڤبه‌را سوننه‌ و شیعه‌یان دا.
 سه‌ره‌دانا سه‌رۆك بارزانى پشتى نێزیكى 6 سالان بۆ به‌غدایێ و كۆمبوونا وى دگه‌ل سه‌رۆك وه‌زیرێ ئیراقێ، محه‌مه‌د شیاع سودانى و مه‌زنه‌ سه‌ركرده‌یێن بڕیار بده‌ستێن ئیراقێ و هژماره‌كا بالیۆزێن وه‌لاتێن بالاده‌ست ل ئیراقێ وه‌كى بالیۆزێ ئه‌مریكا، بریتانیا و ئیرانێ، ل گۆره‌ى چاڤدێران رۆل و پێگه‌هێن سه‌رۆك بارزانى نیشان دده‌ت بۆ ده‌ربازكرنا پرۆسه‌یا سیاسى ژ ره‌وشا نها یا چه‌قبه‌ستى و نه‌ بتنێ وه‌لاتیێن هه‌رێمێ به‌لكو هه‌مى ئیراقێ ب سه‌ره‌دانه‌كا ئومێد به‌خش دبینن.
سیاسه‌تمه‌دار و چاڤدێرێن سیاسى ژى ل دۆر سه‌ره‌دانا سه‌رۆك مه‌سعوود بارزانى بۆ گاڤ دده‌نه‌ د ده‌نه‌ زانین، سه‌ره‌دا ئاماژه‌یه‌كه‌ بۆ ب دویماهیهاتنا كێشه‌یێن دناڤبه‌را هه‌ولێر و به‌غدایێ دا و ده‌ستپێكرنا قووناغه‌كا دى ژ په‌یوه‌ندییان و خۆ ئاماده‌كرن بۆ رویدان و پێشهاتیێن نوى كو دێ ده‌ڤه‌ر ب خۆڤه‌ بینیت.