په‌یامه‌كا توند ژ سه‌درى بۆ توركیا
بەلاڤ بکە
گاڤ نيوز
رێبه‌رێ ره‌وتا سه‌در نه‌رازيبوونا خۆ ل دۆر هێرشا توركيا يا ئه‌ڤرۆ بۆ سه‌ر گوندێ په‌ره‌خێ ل سنوورێ زاخۆ نیشاندا و داخوازا گرتنه‌به‌را ژماره‌يه‌كا رێكاران ل به‌رانبه‌ر توركيا كر ئه‌گه‌ر هێرشان نه‌راوه‌ستينيت.
موقته‌دا سه‌در د تويته‌كێ دا داخوازا گرتنه‌به‌را ژماره‌يه‌كا رێكاران ل هه‌مبه‌ر توركيا كر ئه‌گه‌ر هێرشێن خۆ نه‌راوه‌ستينيت كر و دياركر؛ پێشنياز دكه‌م په‌يوه‌نديێن دپلۆماسى ل گه‌ل توركيا بهێنه كێمكرن، فرۆكه‌خانه و ده‌رگه‌هێن سنوورى ل گه‌ل توركيا بهێنه گرتن ئه‌گه‌ر توركيا هێرشان نه‌راوه‌ستينيت.
داخواز ژى كر كو؛ سكالايه‌ك ل به‌رانبه‌ر نه‌ته‌وه‌يێن ئێكگرتى ب رێكێن فه‌رمى و ب له‌زترين ده‌م بهێته تۆماركرن هه‌روه‌سا رێككه‌فتنا ئه‌منى ل گه‌ل توركيا بهێته هه‌لوه‌شاندن ئه‌گه‌ر توركيا سۆزێ نه‌ده‌ت كو ئاخا ئيراقێ تۆپباران نه‌كه‌ت ب تنێ د حاله‌ته‌كێ دا نه‌بيت ئه‌و ژى حكومه‌تا ئيراقێ پێبحه‌سينيت و داخوازا هاريكاريێ ژێ بكه‌ت ئه‌گه‌ر گه‌ف ل نزيك سنوورێن وێ هه‌بن.
ديار ژى كر؛ ده‌ستدرێژيێن ل سه‌ر پارێزگه‌هێن هه‌رێما كوردستانێ ئێدى ناهێنه قه‌بويلكرن.
د تۆپبارانكرنه‌كا توركى دا ل سه‌ر جهه‌كێ گه‌شتيارى ل گوندێ په‌ره‌خێ ل قه‌زا زاخۆ تا نوكه 10 كه‌سان گيانێ خۆ ژده‌ستداينه و 26 كه‌سێن دى بريندار بوونه، ئه‌ڤ چه‌نده ل گۆره‌ى پێزانينێن په‌يامنێرێ گاڤ نيوز ل سنوورێ زاخۆ.
