سهرۆك نێچيرڤان بارزانى پهيامهك بهلاڤكر
گاڤ نيوز
سهرۆكێ ههرێما كوردستانێ ئهڤرۆ رۆژا چارشهمبيێ هێرشا توركيا ل سهر پهرهخێ ل سنوورێ زاخۆ شهرمزار كر و داخوازا راوهستاندنا ڤان هێرشان كر.
سهرۆك نێچيرڤان بارزانى د راگههاندنهكێ دا دياركر؛ ب توندى تاوانا تۆپبارانكرنا ئهڤرۆ يا سنوورێ زاخۆ شهرمزار دكهين كو بوويه ئهگهرێ گيانژدهستدانا ژمارهيهكا وهلاتى و گهشتيارێن سڤيل يێن دهڤهرێن جودا جودا يێن ئيراقێ و برينداربوونا ژمارهيهكا دى.
د راگههاندنێ دا هاتيه ژى؛ دوبارهبوونا تۆپبارانان و بهردهواميا شهڕ و پێكدادانێن توركيا و چهكدارێن پهكهكێ ل سنووران، ب تهمامى يا رهتكريه و ناهێته قهبويلكرن كو بوويه ئهگهرێ تێكدانا ئاسايش و سهقامگيريا ههرێما كوردستانێ و سنوورێ نێڤدهولهتى يێ ئيراقێ ههروهسا چولكرنا ب سهدان گوندێن دهڤهرێ.
تێدا هاتيه ژى؛ پرسه و سهرهخۆشيێن خۆ يێن كوير ئاراستهى خێزان و كهسوكارێن قۆربانيان دكهين و ئهم ههڤخهمێن وانين، هيڤيا چاكبوونا ب لهز بۆ برينداران ژى دخوازين.
سهرۆكێ ههرێما كوردستانێ ديار ژى كر؛ نهخۆشخانه و لايهنێن پهيوهنديدار يێن ههرێما كوردستانێ ههمى ههڤكارى و خزمهتگۆزاريێن پێدڤى پێشكێشى بريندار و بهركهفتيێن هێرشێ دكهن.
سهرۆكێ ههرێمێ ژ سوپايێ توركيا و چهكدارێن پهكهكێ خواست كو شهڕ و پێكدادانان رابگرن و زێدهتر نهبنه ئهگهرێ كۆشتن و وێرانكاريێ ل دهڤهرێن سنوورى و داخواز ژ حكومهتا ئيراقێ ژى كر كو ههمى رێكارێن پێدڤى بۆ رێگرتنێ ل دوبارهبوونا ڤان تاوانان بگريته بهر و ژ ئاخا ئيراقێ ههڕهشه ل سهر ئاسايشا وهلاتێن جيران نههێنه كرن.