گاڤ نيوز

سه‌رۆكێ هه‌رێما كوردستانێ ئه‌ڤرۆ رۆژا ئێكشه‌مبيێ راگه‌هاند كو نه‌خۆشخانه‌يێن هه‌رێما كوردستانێ و تيمێن پزيشكى د به‌رهه‌ڤن هه‌مى هاريكاريان بۆ بريندارێن رويدانا هه‌ڕفتنا مه‌زاره‌كێ شيعى ل كه‌ربه‌لا پێشكێش بكه‌ن.

سه‌رۆك نێچيرڤان بارزانى د تويته‌كێ دا دياركر؛ ب مخابنى ڤه‌ نووچه‌يێ هه‌ڕفتنێ ل مه‌زارێ قه‌تاره‌ ئيمام عه‌لى (س) ل كه‌ربه‌لا گه‌هشته‌ مه‌ كو بوويه‌ ئه‌گه‌رێ برينداربوونا ژماره‌يه‌كا وه‌لاتيان.

راگه‌هاند ژى؛ نه‌خۆشخانه‌يێن هه‌رێما كوردستانێ و تيمێن پزيشكى د به‌رهه‌ڤن هه‌مى هاريكاريان بۆ بريندارێن رويدانێ پێشكێش بكه‌ن.

دوهى پشكه‌ك ژ مه‌زارێ قه‌تاره‌ ئيمام عه‌لى (س) ل كه‌ربه‌لا هه‌ڕفت بوو و تا نوكه‌ تيمێن به‌رگريا شارستانى ل كه‌ربه‌لا د بزاڤێن رزگاركرنێ دا د به‌رده‌وامن و شياينه‌ دو زارۆكان و سنێله‌يه‌كێ رزگار بكه‌ن و تا نوكه‌ چار ته‌ڕم ژ بن ئاڤاهى ڤه‌ ده‌رئێخستينه‌.

وه‌زاره‌تا ساخله‌ميێ يا ئيراقێ ئه‌ڤرۆ رۆژا ئێكشه‌مبيێ راگه‌هاند كو چار كه‌سان ژ ئه‌نجامێ رويدانا ل كه‌ربه‌لا گيانێ خۆ ژده‌ستداينه‌ و 6 كه‌س ژ بن ئاڤاهيێ هه‌ڕفتى ڤه‌ هاتينه‌ ده‌رئێخستن.