سهدر: پلاسخارت راست دبێژيت و نوينهرێ ئيراقێ د نهتهوهيێن ئێكگرتى دا راست نابێژيت
گاڤ نيوز
سهرۆكێ رهوتێ سهدر ئهڤرۆ سێشهمبيێ پێشوازيا خۆ ل گۆتارا جێنين پلاسخارت نوينهرا نهتهوهيێن ئێكگرتى يا كو ل جڤاتا ئاسايشێ يا نێڤدهولهتى پێشكێشكرى دهربڕى ههروهسا رهخنه ل پهيڤا نوينهرێ ئيراقێ د نهتهوهیێن ئێكگرتی دا گرت.
د تويتهكا موقتهدا سهدر دا هاتيه؛ ئاخفتنا پلاسخارت ل دۆر وێ چهندێ كو ئهگهرێ سهرهكى يێ رهوشا ئيراقێ يا نوكه گهندهلى يه ئاخفتنهكا راست و د جهێ خۆ دا يه.
تێدا هاتيه ژى؛ ئێكهم گاڤ بۆ چاكسازيێ ئهوه سهروچاڤێن كهڤن پشكداريێ د حكومهتا بهێت دا نهكهن.
ديار ژى كر؛ ئهم ل گهل دانوستاندنێ نه ئهگهر يا ئاشكرا بيت و ژ بۆ دويركرنا كهسێن ژ بهرى نوكه پشكدارى د پرۆسێسا سياسى دا كرين و ژ بۆ لێپرسينێ ل گهل گهندهلان بيت.
زێده ژى كر: داخوازێ ژ ههمى لايان دكهم پهنايێ بۆ توندوتيژيێ و چهكى نهبهن.
سهدر داخواز ژ وهلاتێن دهروبهر كر كو مايتێكرنێ د ئيراقێ دا نهكهن و هێرشان ل سهر ئاخا ئيراقێ ئهنجام نهدهن ههروهسا داخواز ژ جڤاتا ئاسايشێ يا نێڤدهولهتى كر كو پهيڤا محهمهد حسێن بهحر ئهلعلوم نوينهرێ ئيراقێ د نهتهوهيێن ئێكگرتى دا يا ئهڤرۆ ل جڤاتا ئاسايشێ يا نێڤدهولهتى پێشكێشكرى ب چ ڤه وهرنهگرن چونكى ل گۆرهى دهربڕينا سهدرى "پتريا ئاخفتنێن وى د راست نهبوون".
جێنين پلاسخارت نوينهرا نهتهوهيێن ئێكگرتى ل ئيراقێ ئهڤرۆ د كۆمبوونا جڤاتا ئاسايشێ يا نێڤدهولهتى دا راپۆرتهك ل دۆر رهوشا ئيراقێ پێشكێشكر بوو و تێدا راگههاند بوو كو پرۆسێسا سياسى ل ئيراقى شكهستن ئينايه و چ بههانه بۆ كوشتنا ب سهدان خۆنيشاندهران نينن.
ناڤهاتيێ ديار ژى كربوو كو ئيراق د قووناغهكا مهترسيدار دا دبۆريت و گهندهلى بوويه كێشه ل ئيراقێ و پێدڤيه بهێته چارهسهركرن.