گاڤ نیوز – تایبەت

دوهی نێزیکی دەمژمێر 4:00ی ئێڤارێ ل کەمپا باعەدرێ یا ئاوارەیێن شنگالێ کچەکێ ئاگر بەردا خۆ و ژیانا خۆ ژدەست دا.

ئاوارەیەکێ کەمپا باعەدرێ کو نەخواست ناڤێ وی بهێتە ئاشکراکرن بۆ گاڤ گۆت: ئەو کچە ب ناڤێ وێ (ن. س. ئـ) یە و ژیێ وێ 13 سالن و دوهی د ناڤ خیڤەتا خۆ دا ئاگر بەردایە خۆ و ژبەر زێدەهیا رێژەیا سۆتنێ، ئەڤرۆ رۆژا ئێکشەمبی ژیانا خۆ ژ دەست دایە.

سەبارەت چەوانی و ئەگەرێن رویدانێ ژێدەرێ گاڤ دیار کر، دایکا وێ بەری رویدانێ گۆتیێ "تو هەر شەڤ حەتا سپێدێ ب مۆبایلێ ڤە یا مژویلی و نانڤی و ئەگەر هەر هۆسا بەردەوام بی، دێ من نەچار کەی مۆبایلێ ژتە وەربگرم".

ژێدەری دا زانین ژی: پشتی وان گۆتنان دایکا وێ ژمال دەردکەڤیت و دچیتە نەخۆشخانێ، لێ هێشتا دایکا وێ ڤەنەگەڕیایە مال، ئەو کچ ئاگری بەرددەتە خۆ و خۆ دسۆژیت و پاشی دهێتە ڤەگوهاستن بۆ نەخۆشخانێ لێ ژبەر زێدەهیا رێژەیا سۆتنا لاشێ وێ ژیانا خۆ ژدەست دا و ئەڤرۆ سپێدێ تەرمێ وێ هاتە ڤەگوهاستن بۆ شنگالێ و ل وێرێ هاتە ب ئاخسپاردن.