فره‌نسا دێ قوتابخانه‌يا قوبەهان ل ئامێديێ نويژه‌ن كه‌ت
بەلاڤ بکە
گاڤ نيوز
بالیۆزێ فره‌نسا بڕياردا قوتابخانه‌يا قوبەهان و چەند جهێن دی یێن شینواری ل ئامێديێ ل سه‌ر ئه‌ركێ وه‌لاتێ فره‌نسا نويژه‌ن بكه‌ت.
په‌يامنێرێ گاڤ دياركر؛ وارشین سه‌لمان محه‌مه‌د تاهر دەڤەردارێ ئامێدیێ ئەڤرۆ رۆژا دوشەمبیێ پێشوازی ل ئێریك شۆڤالیێ بالیۆزێ کۆمارا فره‌نسا ل ئیراقێ و ئۆلیڤیێ دیکۆتينى کۆنسۆلێ گشتى یێ کۆمارا فرەنسا ل هەرێما کوردستانێ و شاندەکێ دگەل دا کر کو رێڤەبەرێ پولیسێن قــەزا ئامێدیێ و نوینەرێ رێڤەبەریا شینوارێن دهۆکێ ل قەزا ئامێدیێ ژی تێدا بەرهەڤ ببوون.
خۆيا ژى كر؛ د دیدارەکێ دا دەڤەردارێ ئامێدیێ و بالیۆزێ کۆمارا فره‌نسا ل ئيراقێ و شاندێ دگەل دا کو ژ دو رێکخراوێن فرەنسی پێکهاتبوون گەنگەشە ل سەر چه‌وانیا نویژەنکرنا قوتابخانه‌يا قوبەهان، منارا مزگەفتا ئامێدیێ و کەنیسه‌يا کەڤنا ئامێدیێ کرن و پشتی شاندێ کۆمارا فرەنسا سەرەدانا جهێن شینواری یێن ناڤهاتى کری و ژ نزیک ئه‌و جهه ديتين، بریاڕ دا جهێن شینواری یێن ئاماژەپێکری ل سەر ئەرکێ وەلاتێ وان بهێنە نویژەنکرن.
ژ لایێ خۆڤە، ده‌ڤەردارێ ئامێدیێ خۆشحالیا خۆ بەرانبەر سەره‌دانا شاندێ فره‌نسى دیارکر و سوپاسیا وان بۆ هاریکاریا وان و وێ گرنگیا وەلاتێ فرەنسا ددەتە جهێن شینواری یێن دەڤەرێ کر و هیڤی خواست کو د پاشه‌رۆژێ دا هاریکارى و هەڤکاریێن فرەنسا ل گەل حکومەتا هەرێمێ بۆ نویژەنکرن و پاراستنا جهێن شینواری یێن سنوورێ دەڤەرداریا ئامێدیێ بەردەوام بن.
