گاڤ

د كۆمبوونا ئه‌ڤرۆ یا جڤاتا وه‌زیرێن ئیراقێ دا بڕیار هاته‌ دان پرۆژه‌ یاسایا سه‌ربازیا نه‌چارى ژ په‌ڕله‌مانى بهێته‌ ڤه‌كێشان هه‌روه‌سا هژماره‌كا بریارێن دى هاتنه‌ دان.

ئه‌ڤرۆ د كۆمبوونا هه‌فتیانه‌یا جڤاتا وه‌زیرێن ئیراقێ دا ب سه‌رۆكاتیا سه‌رۆكوه‌زیرێن ئیراقێ محه‌مه‌د شیاع سودانى دا هژماره‌كا بڕیاران هاتنه‌ دان، ژ وان ژى ڤه‌كێشانا پرۆژه‌ یاسایا سه‌ربازى یا نه‌چارى ژ په‌ڕله‌مانێ ئیراقێ ب كۆما ده‌نگێن جڤاتا وه‌زیران.

ل گۆره‌ى راگه‌هاندنا نڤیسینگه‌ها سه‌رۆكوه‌زیرێ ئیراقێ هه‌ر د كۆمبوونا ئه‌ڤرۆ دا بڕیار هاته‌ دان، ئیمتیازاتێن به‌رپرس و خودانێن پله‌یێن بلند و تایبه‌ت بهێنه‌ كێمكرن.

هه‌روه‌سا ل گۆره‌ى بڕیارێن ئه‌ڤرۆ یێن جڤاتا وه‌زیرێن ئیراقێ، دێ 3 ملیار دینار بۆ كه‌رتێ ساخله‌میێ هێنه‌ ته‌رخانكرن. وه‌زاره‌تێن په‌یوه‌ندیددار هاتینه‌ راسپاردرن بۆ دورستكرنا كۆمپانیه‌كا په‌یوه‌ندیا نیشتیمانى. هه‌ماهه‌نگیكرن دگه‌ل كۆمپانیێن نێڤده‌وله‌تى یێن هوربینیێ بۆ زانینا رێژه‌یا وى پاره‌یێ هاتیه‌ دزین و بۆ ده‌رڤه‌ى ئیراقێ هاتیه‌ هنارتن.