"خودان پێدڤیێن تایبەت پێدڤی ب رێزگرتنێنە نەکو دلپێڤەمانێ"
12/03/2022 - 11:49
گاڤ
وەزیرا کار و کاروبارێن جڤاکی ب هەلکەفتا رۆژا جیهانی یا خودان پێدڤیێن تایبەت گۆتارەک بەلاڤ کر و تێدا راگەهاند: پتری 100 هزار خودان پێدڤیێن تایبەت ل هەرێما کوردستانێ مفادارن.
کوێستان محەمەد، وەزیرا کار و کاروبارێن جڤاکی د گۆتارەکێ دا راگەهاند: خودان پێدڤیێن تایبەت پێدڤی ب رێزگرتنێنە نەکو دلپێڤەمانێ و حکومەتا هەرێما کوردستانێ کار ل سەر بجهئینانا هەموو ماددەیێن یاسایا ژمارە 22 یا سالا 2011ێ دکەت.
دەربارەی ژمارەیا خودان پێدڤیێن تایبەت و ژمارەیا رێکخراوێن کار بۆ خزمەتا وان دکەن، وەزیرا کار و کاروبارێن جڤاکی دیار کر: مووچەیێ 12 هزار و 689 خودان پێدڤیێن تایبەت هاتبوو بڕین، لێ پشتی پشکنین بۆ هاتینە کرن، مووچەیێ وان هاتیە ڤەگەڕاندن و نوکە ل هەرێما کوردستانێ نێزیکی 100 هزار خودان پێدڤیێن تایبەت مفادارن و نێزیکی 10 هزاران ژ وان کارمەندێن حکومەتێ نە.