زێلێنسكى گه‌هشته ئه‌مريكا و واشنتۆن دێ سيسته‌مێ پاتريۆت پێشكێشى ئۆكراينا كه‌ت
بەلاڤ بکە
گاڤ
سه‌رۆكێ ئۆكراينا ئه‌ڤرۆ چارشه‌مبيێ د ئێكه‌م سه‌ره‌دانا خۆ دا هه‌ر ژ ده‌ستپێكرنا شه‌ڕى ل ئۆكراينا گه‌هشته ئه‌مريكا و ئه‌مريكا بڕيار دا سيسته‌مێ پاترۆت پێشكێشى ئۆكراينا بكه‌ت.
ئاژانسان به‌لاڤكرينه؛ ڤولوديمێر زێلێنسكى سه‌رۆكێ ئۆكراينا ژ بۆ كۆمبوونێ ل گه‌ل جۆ بايدن گه‌هشته كۆچكا سپى يا ئه‌مريكى و ژ لايێ جۆ بايدن سه‌رۆكێ ئه‌مريكا ڤه پێشوازى لێ هاته كرن.
زێلێنسكى دێ گۆتاره‌كێ ل كۆنگرێسێ ئه‌مريكا پێشكێش كه‌ت هه‌روه‌سا دێ پرێس كۆنفرانسه‌كێ هه‌ڤپشك ل گه‌ل جۆ بايدن سه‌رۆكێ ئه‌مريكا گرێده‌ت.
هه‌ڤده‌م ل گه‌ل سه‌ره‌دانا سه‌رۆكێ ئۆكراينا، وه‌زاره‌تا ده‌رڤه يا ئه‌مريكا پێشكێشكرنا هاريكاريێن سه‌ربازى يێن نوى بۆ ئۆكراينا ب بهايێ 1.85 مليار دولاران راگه‌هاند.
د به‌يانه‌كا وه‌زاره‌تا ده‌رڤه يا ئه‌مريكا دا هاتيه؛ هاريكاريێن سه‌ربازى يێن نوى سيسته‌مێ پاتريۆت يێ به‌رگريا ئاسمانى ب خۆڤه دگريت كو ده‌مه‌كێ درێژه كيێڤ داخوازا وى سيسته‌مى ژ واشنتۆن كريه.
ب ڤێ چه‌ندێ سه‌رجه‌مێ هاريكاريێن سه‌ربازى يێن ئه‌مريكا بۆ ئۆكراينا هه‌ر ژ ده‌مێ گه‌هشتنا جۆ بايدن بۆ سه‌ر ده‌ستهه‌لاتێ گه‌هشته 21 مليار دولاران.
سه‌ره‌دانا سه‌رۆكێ ئۆكراينا بۆ ئه‌مريكا ب سه‌ره‌دانا وى يا ئێكێ بۆ ژ ده‌رڤه‌ى وه‌لاتى هه‌ر ژ ده‌ستپێكا شه‌ڕێ رۆسيا بۆ سه‌ر ئۆكراينا ل 24ى شوباتێ دهێته هژمارتن.
