گاڤ

سه‌رۆكێ به‌رێ يێ وه‌لاته‌كی ب تۆمه‌تێن سپيكرنا پاره‌ى و وه‌رگرتنا به‌رتيلان ب 11 سالان هاته‌ حوكمكرن.

ئاژانسان ئه‌ڤرۆ ئێكشه‌مبيێ به‌لاڤكرينه‌؛ عبدالله يه‌مين سه‌رۆكێ به‌رێ يێ مالديڤێ ب تۆمه‌تێن سپيكرنا پاره‌ى و وه‌رگرتنا به‌رتيلان ب 11 سالان هاته‌ حوكمكرن زێده‌بارى سزادانێ ب 5 مليۆن دۆلاران.

دادگه‌ها تاوانان دياركريه‌؛ ناڤهاتى هه‌روه‌سا پاره‌ ژ بۆ بكرێدانا گزيرته‌يه‌كا مولكێ ده‌وله‌تێ وه‌رگرتبوون.

"سزايێ 7 سالان ب تۆمه‌تا سپيكرنا پاره‌ى و 4 سالان ژ به‌ر وه‌رگرتنا به‌رتيلان ل سه‌ر سه‌رۆكێ به‌رێ يێ مالديڤێ هاته‌ سه‌پاندن"، ل گۆره‌ى ئاژانسێن نووچه‌يان.

ئه‌ڤه‌ نه‌ جارا ئێكێ يه‌ سه‌رۆكێ به‌رێ يێ مالديڤێ كو ژ سالا 2013 تا 2018 ده‌ستهه‌لات دكر، دهێته‌ حوكمكرن، به‌لكو ل سالا 2019ێ ژى ب تۆمه‌تا سپيكرنا پاره‌ى ب 5 سالان هاتبوو حوكمكرن لێ دادگه‌ها بلند پشتى دو سالان حوكم هه‌لوه‌شاند بوو و دياركر بوو كو هه‌ڤدژى د به‌لگه‌يان دا هه‌نه‌.

ناڤهاتى د هه‌لبژارتنێن سالا 2018ێ دا ل هه‌مبه‌ر ئيبراهيم محه‌مه‌د سلێح سه‌رۆكێ نوكه‌ هاتبوو دۆراندن و د ده‌مێ ده‌ستهه‌لاتداريا وى دا تۆمه‌تێن گه‌نده‌ليێ، سنوورداركرنا راگه‌هاندنێ و سه‌ركۆتكرنا كه‌سێن به‌رهنگارى ده‌ستهه‌لاتێ بۆ وى دهاتنه‌ ئاراسته‌كرن.