به‌يانه‌كا هه‌ڤپشك ژ سودانى و نه‌ته‌وه‌يێن ئێكگرتى ل دۆر مولكداريا خانيێن ئێزديان
بەلاڤ بکە
گاڤ
سه‌رۆكوه‌زيرێ ئيراقێ و نه‌ته‌وه‌يێن ئێكگرتى ئه‌ڤرۆ چارشه‌مبيێ به‌يانه‌كا هه‌ڤپشك ل دۆر مولكداريا ئێزديان بۆ خانيێن خۆ ل شنگالێ پشتى 47 سالان ژ بێبه‌هركرنێ راگه‌هاندن.
هه‌ر ژ سالا 1975 و ژ به‌ر سياسه‌تێن جوداكارى ل ئيراقێ نزيكى چارێك مليۆن ئێزديان ل قه‌زايا شنگالێ ل پارێزگه‌ها نه‌ينه‌وا ژ مولكداريا خانيێن خۆ هاتبوونه بێبه‌هركرن.
جڤاتا وه‌زيرێن ئيراقێ ل 12/12/2022 ل سه‌ر مه‌رسوومه‌كێ رازيببوو كو تێدا مافێ مولكداريا خانيێن ئێزديان ل 11 كۆمه‌لگه‌هێن ئاكنجيبوونێ دابوو وان ئه‌و ژى كۆمه‌لگه‌هێن خانه‌سۆر، دوگرى، بورك، گوهبه‌ل، زورافا، دهۆلا، تل قصب، تل بنات، تل عزێر، سێبا شێخدرى، كرزك بوون.
محه‌مه‌د شياع سودانى سه‌رۆكوه‌زيرێ ئيراقێ ئه‌ڤرۆ چارشه‌مبيێ راگه‌هاند؛ پشتى 47 سالان ژ سياسه‌تێن جوداكارى يێن رژێما به‌رێ يا ئيراقێ، جڤاتا وه‌زيران بڕيارا مولكداريا ئێزديان بۆ خانيێن وان ل شنگالێ دا.
ژ لايێ خۆڤه، جێنين پلاسخارت نوينه‌را ئه‌ميندارێ گشتى يێ نه‌ته‌وه‌يێن ئێكگرتى راگه‌هاند؛ ئه‌ڤه بڕياره‌كا ڤه‌بڕ بوو ژ لايێ جڤاتا وه‌زيرێن ئيراقێ ڤه و دانپێدانه‌كا فه‌رمى يه ب مولكداريا ئێزديان بۆ خانيێن وان و دێ هاندانا وان بۆ ڤه‌گه‌ڕيانێ بۆ شنگالێ كه‌ت.
