گاڤ

رێڤەبەریا سەقاناسی و بیڤەلەرزان یا حکومەتا هەرێما کوردستانێ پێشبینیێن سەقای یێن ئەڤرۆ و سوبەهی بەلاڤکرن و پێشبینیا بارینا بەفرێ کر.

ل گۆرەی پێشبینیێن سەقاناسیێ، ئەڤرۆ رۆژا ئێکشەمبی 8-1-2023 ئاسمان دێ ب تەمامی عەور بیت ل گەل دروستبوونا مژێ ل هەندەک دەڤەران، بارانبارین ل دەڤەرێن چیایی دێ یا بەردەوام بیت و بەفر ژی دێ ل پتریا دەڤەرێن چیایی باریت و تا درەنگی شەڤ دێ یا بەردەوام بیت.

هەروەسا دیار کر: سوبەهی رۆژا دوشەمبی ئاسمان دێ عەور بیت، ل سنۆری پارێزگەهێن دهۆک و هەولێرێ باران دێ باریت ل گەل بارینا بەفرێ ل پشکەکا دەڤەرێن چایی و ل ئێڤاریا رۆژا دوشەمبیێ پێلا بەفر و بارانان دێ بدوماهی هێت.

سەقاناسیا هەرێمێ دا دیارکرن ژی کو نزمترین پلەیا گەرمێ ئەڤرۆ ل پارێزگەها دهۆکێ دێ ل ئامێدیێ هێتە تۆمارکرن کو دێ گەهیتە 2 پلەیێن سیلیزی.

ژ ئالیێ خۆڤە ژی رێڤەبەریا گشتی یا چاندنێ ل دهۆکێ راگەهاند؛ د 24 دەمژمێرێن بۆری دا پترین رێژەیا بارانێ ل ئاکرێ باریە کو گەهشتیە 14.8 ملیمەتران. ل زڤستانا پار تا رۆژا 8-1-2022 ل دهۆکێ 99.7 ملیمەترێن بارانێ باریبوون و ئەڤسالە تا ئەڤرۆ 164.3 ملیمەتر بارینە.