ژڤانێ ئه‌ندامبوونا سويد و فينله‌ندا د ناتۆيێ دا هاته ئاشكرا كرن
بەلاڤ بکە
گاڤ
هه‌ڤپه‌يمانيا باكۆرێ ئه‌تله‌نتيكى ’ناتۆ’ ئه‌ڤرۆ ئێكشه‌مبيێ ژڤانێ پێشبينيكرى يێ ئه‌ندامبوونا سويد و فينله‌ندا دناڤ هه‌ڤپه‌يمانيێ دا ئاشكرا كر.
يێنس ستۆلتينبێرگ ئه‌ميندارێ گشتى يێ ناتۆيێ بۆ ئاژانسا فرانس پرێس راگه‌هاند؛ پێشبينى دكه‌م د ئه‌ڤ ساله دا 2023ێ پرۆسێسا ئه‌ندامبوونا سويد و فينله‌ندا د ناتۆيێ دا ته‌مام ببيت لێ نه‌شێم وێ رۆژێ ب دروستى ده‌ستنيشان بكه‌م.
ئاشكرا ژى كر؛ ده‌م هات كو شوينتبلێن دويماهيێ يێن ئه‌ندامبوونا سويد و فينله‌ندا د ناتۆيێ دا و په‌ژراندنا پرۆتوكۆلێ ئه‌ندامبوونێ بهێنه دانان.
سويد و فينله‌ندا ل هه‌يڤا تيرمه‌ها سالا 2022ێ ياداشتنامه‌يه‌كا هه‌ڤپشك ل گه‌ل توركيا ژ بۆ رازيبوونێ ب مه‌رجێن توركيا ژ بۆ ئه‌ندامبوونا وان د ناتۆيێ دا ئيمزاكربوو.
ئۆلف كريستێنسۆن سه‌رۆكوه‌زيرێ سويدێ ژ به‌رى نوكه دياركر بوو كو توركيا هنده‌ك داخوازى ژ وان كرينه كو ئه‌و نه‌شێن بجهبينين.
هه‌ڤده‌م يێنس ستۆلتينبێرگ دبێژيت "حه‌ز دكه‌م ب زويترين ده‌م سويد و فينله‌ندا ببنه ئه‌ندام د ناتۆيێ دا و ئه‌ڤ پرۆسێسه ژ راست ب له‌زتره ژ پرۆسێسێن به‌رێ يێن ئه‌ندامبوونا وه‌لاتان".
ئه‌ميندارێ گشتى يێ ناتۆيێ ديار ژى كر؛ ئه‌ز د وێ باوه‌ريێ دا مه كو ئه‌ڤ پرۆسێسه ل نزيك دێ رويده‌ت.
زێده‌بارى توركيا، هنگاريا ژى ژ وان وه‌لاتايه يێن تا نوكه ئاسته‌نگ د رێكا ئه‌ندامبوونا سويد و فينله‌ندا د ناتۆيێ دا دروستكرين.
