پاشهرۆژا هێزێن ئهمريكى ل سووريا دێ چهوا بيت؟
گاڤ
شرۆڤهكارهك د نڤيسينهكێ د كۆڤارهكا جيهانى دا ئاماژهيێ ددهته پاشهرۆژا هێزێن ئهمريكى ل سووريا.
ژ بهرى نوكه، مهزلۆم عهبدى فهرماندهيێ هێزێن سووريا ديمۆكرات د گۆتارهكێ د واشنتۆن پۆست دا ل دهستپێكا ههيڤا كانوينا ئێكێ يا بۆرى دياركر بوو كو پێدڤيه ئهمريكا ههڤپهيمانێن خۆ ل سووريا ژ بير نهكهت.
ژ لايێ خۆڤه، جێف لامير ژ ئينستيتيۆيا دێفێنس پرايۆريتس د نويترين وهشانا كۆڤارا ناشونال ئينتێرێست دا بهلاڤكريه؛ ههبوونا هێزێن ئهمريكى ل سووريا خۆ ئهگهر تێچوويێن وێ د كێم بن ژى جهێ مهترسيێ يه.
ديار ژى كريه؛ مووشهكێن توركيا ئاراستهى هێزێن سووريا ديمۆكرات كرين، ب دويراتيا 130 ياردهيان ژ هێزێن ئهمريكى كهفتينه خوارێ.
ئهو شرۆڤهكاره ئاماژهيێ ددهته وێ چهندێ ژى كو سووريا نه بهرژهوهنديهكا ستراتيژى يه بۆ ئهمريكا و ديار دكهت "سووريا دكهڤيته د پهراوێزا ستراتيژيهتيا بهرگڕيێ يا ئهمريكى دا و د بهرانبهر دا، سووريا بۆ ئيرانێ دبيته پشكهك ژ ستراتيژيا پاشڤهبرنێ و گرێدانا تۆرا ئايينى يا گرێداى ب ئيرانێ ڤه".
خۆيا ژى دكهت؛ هێزێن ئهمريكى ل باكۆر و باكۆرێ رۆژههلاتێ سووريا ژمارهيا وان ژ 900 سهربازان نابۆريت.
ل ڤێ دويماهيێ، پشتى بزاڤێن ئاسايكرنا پهيوهنديان دناڤبهرا توركيا و سووريا دا، هێزێن كوردى ل سووريا ژ وێ چهندێ دترسن كو ئهڤ چهنده ل سهر حسێبا دوزا كوردى بيت و ئهمريكا وهك پێدڤى بهرگڕيێ ژ هێزێن سووريا ديمۆكرات ههڤپهيمانا خۆ د شهڕێ دژى داعش دا نهكهت.
"دهستكهفتيێن ههڤپشك يێن ژناڤبرنا داعشێ ل سالا 2019 دێ رويبروى مهترسيێ بن ئهگهر ئهمريكا پشتا خۆ بدهته هێزێن كوردى"، ل گۆرهى مهزلۆم عهبدى فهرماندهيێ هێزێن سووريا ديمۆكرات.
ئهڤ رۆنكرنێن مهزلۆم عهبدى پشتى چهند رۆژان ژ هێرشێن توركيا ل سهر دهڤهرێن د بن كونترۆلا هێزێن سووريا ديمۆكرات دا هاتبوون.