د. فوئاد حسێن بۆ چارهسهركرنا كێشهيا بلندبوونا بهايێ دۆلارى دێ چيته ئهمريكا
گاڤ
جێگرێ سهرۆكوهزيرێ ئيراقێ و وهزيرێ دهرڤه ژ بۆ چارهسهركرنا كێشهيا بلندبوونا بهايێ دۆلارى دێ سهرهدانا ئهمريكا كهت.
ل گۆرهى زانياريێن ب دهست گاڤ كهفتين؛ دهێته چاڤهرێكرن د. فوئاد حسێن پشتى حهفتيهكێ ژ نوكه سهركردايهتيا شاندهكێ حكومى يێ ئيراقى بۆ سهرهدانا واشنتۆن و كۆمبوونێ ل گهل بهرپرسێن ئهمريكى ژ بۆ چارهسهركرنا كێشهيا بلندبوونا بهايێ دۆلارى بهرانبهر دينارى بكهت.
شاندێ ئيراقى دێ داخواز ژ ئهمريكا كهت كو هاريكاريا ئيراقێ ژ بۆ سهقامگيركرنا بهايێ دۆلارى و رێگرتنێ ل رهڤاندنا دۆلارى بۆ ژ دهرڤه كهت.
دهێته چاڤهرێكرن پشتى سهرهدانا جێگرێ سهرۆكوهزيرێ ئيراقێ، سهرۆكوهزيرێ ئيراقێ ژى ل گهل شاندهكێ حكومى بۆ ههمان بابهت سهرهدانا واشنتۆن بكهت و ئيراق تێدا دێ بزاڤێ كهت بهايێ دۆلارى ببيته 1470 دينار بۆ ههر دۆلارهكێ.
ههر ژ ههيڤا چريا دویێ يا بۆرى و تا نوكه بهايێ دۆلارى بهرانبهر دينارێ ئيراقى نهسهقامگيريهك ب خۆڤه ديتيه و بهردهوام د بلندبوونێ دابوو و تا كو گههشتيه 166 هزار ديناران بۆ ههر 100 دۆلاران.
بۆرسهيا كيفاح يا ناڤهندى ل بهغدا د سهرهدهريێن ئهڤرۆ ئێكشهمبيێ دا ل سهر بهايێ 164100 ديناران بۆ ههر 100 دۆلاران هاتبوو داخستن.
ههروهسا ل ههولێرێ ل گهل گرتنا بۆرسهيێ بهايێ فرۆشتنێ 165750 دينار بۆ ههر 100 دۆلاران بوو و بهايێ كڕينێ 165725 دينار بۆ ههر 100 دۆلاران بوو.
حكومهتا ئيراقێ د دهمهكێ دى دا ژ ئهڤرۆ حهفت بڕيار بۆ كێمكرنا بهايێ دۆلارى بهرانبهر دينارى دابوون ژ وان ژى ڤهكرنا فرۆشگهههكا نوى بۆ فرۆشتنا دراڤێ بيانى بۆ بازرگانێن بچويك، دانا 500 مليۆن دۆلاران ب بهنكا بازرگانى، بساناهيكرنا رێكارێن هاوردهكرنا كهلوپهلان و لادانا غهرامهيێن گيرۆكرنێ ل گهل ژمارهيهكا بڕيارێن دى.