سه‌رۆكێ حكومه‌تا هه‌رێما كوردستانێ ل فره‌نسا راگه‌هاند هه‌رێما كوردستانێ دێ په‌يوه‌نديێن بازرگانى و وه‌به‌رهێنانێ ل گه‌ل فره‌نسا پێشئێخيت.

مه‌سرور بارزانى سه‌رۆكێ حكومه‌تێ د چارچووڤه‌يێ سه‌ره‌دانا خۆ دا بۆ فره‌نسا ل ئێڤاريا ئه‌ڤرۆ پێنجشه‌مبيێ ل گه‌ل ئيمانوێل ماكرۆن سه‌رۆكێ فره‌نسا كۆمبوو و تێدا ژماره‌يه‌كا ته‌وه‌ران هاتنه‌ به‌حسكرن.

سه‌رۆكاتيا حكومه‌تا هه‌رێمێ راگه‌هاند؛ په‌يوه‌نديێن ديرۆكى و دوستانه‌ دناڤبه‌را فره‌نسا و هه‌رێما كوردستانێ دا و دويماهيك گوهۆڕين و پێشهاتێن ره‌وشا ئيراقێ و ده‌ڤه‌رێ د كۆمبوونا سه‌رۆكێ حكومه‌تێ و سه‌رۆكێ فره‌نسا دا هاتنه‌‌ به‌حسكرن.

ديار ژى كريه‌؛ چاكسازيێن كابينه‌يا نه‌هێ يا حكومه‌تێ ئێك ژ ته‌وه‌رێن دى يێن كۆمبوونێ و ب تايبه‌ت د بوارێن فره‌جۆركرنا ئابوورى و ژێده‌رێن داهاتى دا، گرينگيپێدان ب كه‌رتێ چاندنێ و هنارده‌كرنا به‌رهه‌مێن ناڤخۆيى بۆ بازارێن ده‌رڤه‌ و ب تايبه‌ت يێن ئه‌ورۆپا.

سه‌رۆكێ حكومه‌تێ سوپاسيا فره‌نسا ژ بۆ پشته‌ڤانيا وێ يا به‌رده‌وام ل هه‌رێما كوردستانێ كر و دياركر؛ سه‌رۆك ئێمانوێل ماكرۆن سلاڤێن تايبه‌ت بۆ سه‌رۆك مه‌سعوود بارزانى هه‌بوون و ئاماده‌ييا فره‌نسا بۆ پشته‌ڤانيا هه‌رێما كوردستانێ د هه‌مى بواران دا ده‌ربڕى.

"گرنگيا چاره‌كرنا كێشه‌يێن هه‌ولێر- به‌غدا ب شێوه‌يه‌كێ بنه‌ره‌تى و ل سه‌ر بنياتێ ده‌ستوورى و پاراستنا ئاسايش و سه‌قامگيريا ده‌ڤه‌رێ ته‌وه‌ره‌كێ دى يێ كۆمبوونێ بوون"، به‌يانا حكومه‌تا هه‌رێمێ زێده‌ كريه‌.

سه‌رۆكێ حكومه‌تا هه‌رێمێ هه‌روه‌سا د تويته‌كێ دا ل دۆر كۆمبوونێ راگه‌هاند؛ هه‌رێما كوردستانێ و فره‌نسا د پاراستنا جيهانێ دا ژ تيرۆرێ د هه‌ڤكار بوون و نوكه‌ دێ په‌يوه‌نديێن خۆ ل گه‌ل فره‌نسا د وارێن بازرگانى و وه‌به‌رهێنانێ دا پێشئێخین.

ئاشكرا ژى كر؛ فره‌نسا هه‌ڤپه‌يمانه‌كا خودان ديتنه‌كا هه‌ڤپشكه‌ ل گه‌ل مه‌ د بهێزكرنا هه‌رێما مه‌ و ئێمناهيا ئه‌ورۆپا دا.

ديار ژى كر؛ خۆشحالبووم كو ئه‌ڤرۆ ل كۆچكا ئێليزى ل گه‌ل ئيمانوێل ماكرۆن كۆمبوويم.

سه‌رۆكێ حكومه‌تێ دوهى چارشه‌مبيێ سه‌ركردايه‌تيا شانده‌كێ حكومى بۆ سه‌ره‌دانا فره‌نسا كربوو و د سه‌ره‌دانه‌كا فه‌رمى دا گه‌هشتبوو پايته‌ختێ فره‌نسا.