حكومهت مفايێن ب ئهلهكترۆنيكرنا دانا مووچهيان بهحس دكهت
گاڤ
حكومهتا ههرێما كوردستانێ راگههاند كو شێوازێ پێدانا مووچهيان ب فهرمانبهران دێ هێته گوهۆڕين و خزمهتگۆزاريا پارهدانا ديجيتالى و ’هژمارهيا من’ دێ بهردهست بيت.
حكومهتا ههرێمێ ئهڤرۆ ئێكشهمبيێ راگههاند؛ د گاڤهكا نوى دا بۆ ب ئهلهكترۆنيكرنا كاروبارێن حكومهتێ، دهستپێشخهريا هژمارهيا من ژ لايێ مهسرور بارزانى سهرۆكوهزيرێ ههرێمێ ڤه هاتيه راگههاندن و دێ ژمارهيهكا مفايان بۆ وهلاتيان ههبيت.
ديار ژى كريه؛ ئهڤ چهنده دێ بيته ئهگهرێ ئاسانكاريان و سلامهتيا هژمارهيێن بهنكى، دانا مووچهيان ب رێكوپێكى و د دهمێ خۆ دا بێى سراگرتنێ و كێمكرنا مهترسيا دزينا مووچهى و پاشكهفتى.
خۆيا ژى كريه؛ ههروهسا ئهڤ گوهۆڕينه دێ بيته ئهگهرێ زێدهبوونا داهاتى، كڕينا كهلوپهلان يان پارهدانێ ب خهرجيێن كهسۆكى ب رێكا قهڕێن ب ساناهى، پارهدان بۆ كڕينا كهلوپهل و خزمهتگۆزاريێن ئۆنلاين ب رێكا بكارئينانا كارتا بهنكى، حهوالهيا پارهيان دناڤبهرا هژمارهيێن بهنكى يێن جودا جودا دا ب رێكا كارتێن موبايلێ و ئهنترنێتێ و وهرگرتنا حهوالهيێن نێڤدهولهتى بێى سهرهدانا نڤيسينگههێن ئالوگۆركرنا دراڤى بهێته كرن.
ژ مفايێن دى يێن پرۆژهيێ ’هژمارهيا من’ ل گۆرهى حكومهتێ: زێدهبوونا بهرههمێ ناڤخۆيى ژ بهر پشكداريا وهلاتيان د كهرتێ بهنكى دا، زێدهبوونا خهرجيا بكاربهران ژ ئهگهرێ زێدهبوونا قهرزێ تاكهكهسى، رهخساندنا دهليڤهيێن كارى د كهرتێ تايبهت دا، كێمكرنا پشتبهستنێ ل سهر مامهلهيێن كاش، زێدهكرنا ئهكتيڤيا خكومهتێ و شهفافيهتێ ههروهسا سهرهلدانا پارهدانا ديجيتال بۆ خزمهتگۆزاريێن گشتى.
زێده ژى كريه: حكومهتا ههرێمێ كار ل سهر ب ئهلهكترۆنيكرنا كاروبارێن حكومهتێ و كێمكرنا رۆتينا دامودهزگههان دكهت.