گاڤ

به‌رگڕيا ئاسمانى يا ئۆكراينى ئه‌ڤرۆ دوشه‌مبيێ ئێخستنا 13 فرۆكه‌يێن بێفرۆكه‌ڤان يێن ئيرانى يێن ژ لايێ رۆسيا ڤه‌ شڤێدى هێرش پێ ل سه‌ر ئۆكراينا دهاتنه‌ كرن، راگه‌هاند.
هه‌ر ژ هه‌يڤا سێپته‌مبه‌را سالا بۆرى، ئۆكراينا ديار دكه‌ت كو رۆسيا ب سه‌دان هێرش ل سه‌ر ئۆكراينا ب رێكا چه‌كێن ئيرانى ئه‌نجامداينه‌ و ل هه‌يڤا نوڤه‌مبه‌را بۆرى ئيرانى دانپێدان كربوو كو وێ فرۆكه‌يێن درۆن ’بێ فرۆكه‌ڤان’ داينه‌ رۆسيا.
مالپه‌رێ ئه‌كسيۆس ژ به‌رى نوكه‌ راگه‌هاند بوو كو درۆنێن ئيرانى ب چه‌ند هه‌يڤان ژ به‌رى شه‌ڕى ل ئۆكراينا ژ بۆ رۆسيا هاتينه‌ هنارتن.
"موسكۆيێ ئه‌و فرۆكه‌يێن ئيرانى بۆ ئارمانجگرتنا وێستگه‌هێن وزه‌يێ و ژێرخانه‌يا مه‌ده‌نى بكارئيناينه‌ و ژ به‌ر ڤێ چه‌ندێ ئێكه‌تيا ئه‌ورۆپى و بريتانيا سزا ل سه‌ر ئيرانێ سه‌پاندينه‌"، ل گۆره‌ى ئاژانسان.
وه‌زاره‌تا به‌رگڕيێ يا بريتانى به‌رى چه‌ند رۆژان دياركربوو كو ره‌نگه‌ عومبارگه‌ها رۆسيا ژ فرۆكه‌يێن درۆن يێن ئيرانى ڤالا ببيت.