گاڤ

سه‌رۆكوه‌زيرێ ئيراقێ به‌رى ده‌مه‌كێ كێم راگه‌هاند كو به‌غدا و هه‌ولێر گه‌هشتنه‌ رێككه‌فتنه‌كێ كو ناكۆكيێن ل دۆر په‌ترۆلا كوردستانێ دناڤبه‌را به‌غدا و هه‌ولێرێ دا دێ ب دويماهيك ئينيت و دێ داهاتێ په‌ترۆلا كوردستانێ د به‌نكه‌كێ دا هێته‌ دانان.

محه‌مه‌د شياع سوودانى د پرێس كۆنفرانسه‌كێ دا راگه‌هاند؛ حكومه‌تێن ئيراقێ و هه‌رێما كوردستانێ گه‌هشتنه‌ رێككه‌فتنه‌كێ ل دۆر په‌ترۆلێ و غازێ، ئه‌و ژى ب رێكا دانانا داهاتێ نه‌فتا هه‌رێمێ د ئێك ژ به‌نكان دا.

ئاشكرا ژى كر؛ ئه‌ڤه‌ ئێكه‌م جاره‌ رێككه‌فتن ل سه‌ر دانانا داهاتێ په‌ترۆلا هه‌رێمێ د ئێك ژماره‌يا به‌نكى دا دهێته‌ كرن و هه‌ر ئێك ژ سه‌رۆكوه‌زيرێ هه‌رێمێ و سه‌رۆكوه‌زيرێ ئيراقێ دێ چاڤدێريا وێ ژماره‌يا به‌نكى كه‌ن.

ديار ژى كر؛ هه‌روه‌سا دێ لژنه‌يه‌ك هه‌بيت راسپارده‌يان بۆ سه‌رۆكوه‌زيرێ ئيراقێ بۆ دانا بڕيارێن پێدڤى بلند كه‌ت.

د ده‌مه‌كێ دى دا ژ ئه‌ڤرۆ، جڤاتا وه‌زيرێن ئيراقێ پرۆژه‌ياسايا بودجه‌يا گشتى يا سالێن 2023، 2024 و 2025 و پارێزگه‌هبوونا هه‌له‌بجه‌ په‌سه‌ند كربوو.

سه‌رۆكوه‌زيرێ ئيراقێ سوبه‌هى سێشه‌مبيێ دێ سه‌ره‌دانا هه‌رێما كوردستانێ كه‌ت و ل گه‌ل سه‌ركرده‌يێن هه‌رێمێ كۆمبيت.